Skip to main content

Thailandimiut Filipinerillu: Kalaalerpassuit nikagisarpaatigut

Isit nillertut nikaginnippasittut, suliffissanik arsaarinninneraanerit kiisalu nunaminnut angerlaqqusinerit kangiamiut Nuummi najugallit ilaannut misigisassaasarput

'Kangiamiuugama nikagivaannga? Kalaaliusuuguma allaanerussagaluarpa?' eqqarsaatit taamaattut 30-nik ukiullip Zara Fiore De Ocampop Filippinerineersup niaquani kaavipput. Zara Filippinerineersuuvoq, ukiup aappaassaa Nuummiilluni.

Tikeqqaaramili maluginiarsimavaa kalaallit arlallit kangiamiunut nikaginnittartut. Neriniartarfimmi Bonesimi sulinermi saniatigut unnukkut imerniartarfimmi Muttenimi erinarsortarpoq, erinarsortillunilu arnap aalakoortup ajappaa, kiinaatigut qiserlugu nunaanullu uteqqullugu. Nikagisaasaraluarlunili tunniutiinnarusunngilaq.

8 procentii nikagisaasimapput
Zara Fiore De Ocampo kisimiilluni nikagineqarnermik ilaluarineqarnermillu misigisaqarsimanngilaq. Thailandermiut Filippinerermiullu Nuummi najugallit katillugit 178-pput, 100-it akisassaannik apeqqutinik nassippagut, taakkunanit 30-it spørgeskemanik immersuitereerneranit paasinarsivoq peqataasut 30-it affaat, tassa 178-it 8 procentii nikagineqartutut tikilluaqqusaanngitsutullu misigisaqarsimasut. Suliffissanik arsaarinnittutut ilaluarineqarneq kiisalu ataqqineqannginneq nikagineqarnerlu Thailandermiut Filippinerermiullu misigikkajuppaat.  Zara arnaavoq mikisoq, taartunik pisatalik. Arnaq kusanartoq, meeqqani pingasut qimallugit Nuummut suliartorluni aallarnikoq.

- Ilaquttagut qimallugit suliartortarpugut, suliffiit kalaallit suliffigerusunngisaat suliffigisarpagut tamanna kalaallit akuerisariaqarpaat, Zara qungujulalaarluni oqarpoq.

Erik Brogaard Bonesimik piginnittoq oqarpoq sulisumi nunaqavissunit nikagineqartarneri ataasiaannarnani siumortarsimallugu.

- Aalakoortut aningaasaataarussimasulluunniit taamatut pissusilersortarput, nilliallutik ilaallu ingasattunik toqutsinissamik allaat siorasaarisarlutik. Naammattuuigaangama ingerlaannarlugit inissittarpakka akuerineqarsinnaanngimmata, Erik Brogaard ilumoorsaarpasilluni oqarpoq ilimaginerarlugulu kangiamiut sunngiffimminni inuiaqatigiinnut akuuallaannginneranut tamanna tunngaviusoq.

Kiinnamigut qiserneqarpoq
Unnuit ilaanni unnuami Muttenimi erinarsorpoq. Unillatsiarnerminni tunuminit ajanneqarujussuarpoq, qiviaramilu kiinnamigut arnamit utoqqasaamit aalakoortumit qiserneqarpoq talimigullu tillunneqarluni.

- Tujorminaqaaq, unnuk taanna angerlarserujussualeraluarpunga. Aalakoortuunerusut akerartuisarput, ulluinnarni utoqqasaajunerusut isikkut takuneqarsinnaasumik tikilluaqquserpasinngitsumik isikkoqartarlutik, inuusunnerusulli inussiarnersuusarput, Zara qungujulluni oqarpoq. Sociologip Marie Kathrine Poppelip sooq utoqqasaajunerusut nikaginnittarnerat ima eqqoriarpaa:

- Imaassinnaavoq sungiusimannginamikkit inuluuginnittartut, nunatsinnimi Kangiamiut maanna aatsaat amerliartorlualeramik, oqarpoq. Zara kisimiilluni nikagineqartanngilaq. Kangiamiut apersukkama tamarmik tassaasut Zara Fiore De Ocampo, Sutphirak Praphosri, Maria Jacobsen aamma Sunaree Andersenip tamarmik tamanna anngaallutik misigisaqarfigisimavaat.

27-nik ukiulik Sutphirak Praphosri ulluinnarni Gangimik taaneqartartoq ukiut aqqanillit Nuummi najugaqarsimasoq tikeqqaarami nuanninngitsunik misigisaqartarsimavoq.

- Neriniartarfimmi suligallarama nuanninngitsunik pisinianit oqaluffigineqartarnikuuvunga, soorlu isumaqassanngilatit suullutit, angerlarniarit, uangali tamakku inuttut tigunaveersaartarpakka soqutiginaveersaartarlugillu, Gang oqarpoq. Gang Thailandimeersuuvoq, angajoqqaavilu Nuummi Charoen Pornimi ukiut 18-ssaat igasutut sulillutik. Kiattuneersuulluni nunatsinnut inukitsumut nuulluni Gangimut oqitsuinnaasimanngilaq.

- Tikeqqaarama kiserliortarnikooqaanga, taamanikkut Thailandermiut maani amerlavallaanngillat, inuusuttortaqarpallaaratillu. Uangali ammasuugama ikinngutitaartupallappunga, nalunngilarali amerlasuut kiserliortartut aammami suliinnangajaavittaramik, Gang nasani iluarsiutigalugu oqarpoq. 2003-mi ukioq taanna Gangip Nuummut nuuffiani Thailandermiut Nuummi innuttaassusillit 27-it nalunaarsorneqarsimapput.

Nunasiaataasimanitta kinguneraa
Kommuneqarfik Sermersuumi borgmesterip Asii Chemnitz Narupip Inuit Ataqatigiinneersup ilaluarinnittarneq oqaluttuarisaanermi nalaatanik pissuteqarsoraa.

- Nunasiaataasimanitta kingunerisaanik inuttut ataasiakkaatut naleqassuserput innarlerneqarsimappat ikeq taanna annernartoq allanut tutsissinnaasoortaratsigu, taamaammat imminut tatiginitta naleqartinnittalu makiteqqinnissaanut inuiattut suliassaqarpugut. Immitsinnut naammagisimaarutta allanik tikilluaqqusinissamik ammanerujussuanngussagatta Ilisarnaatigigaluarparpummi inussiarnersuuneq allanik tikilluaqquserusunneq alapernaatsuunerlu, taanna isumaqarpunga annaanaveersaartariaqaripput, Asii Chemnitz Narup ilumoorsaarpasilluni oqarpoq. 

Nikaginnittut amerlavallaaqaat
Krissie Winberg Berthelsenip kangiamiunik sulisoqartup maluginiarsimavaa nunatsinni allamiunik nikaginnittut amerlasoorujussuussut.

- Immitsinnut eqqartuutillaqqisissisimaqaagut, aamma tamanna malugaara piumassutsinnik sulisarninni. Nikassaanerit uparuartuinerillu atugaaqaat, tassami annikitsut pillugit pinnaakkatta. Soorlumi inuiaat massakkut avissaarsimasugut, taamaammallu suliffeqanngikkuit assersuutigalugulu qitornat pingasut pilersugassaralugit, avataaniillu atorfinitsisartut suliffissaarutsitsisutut isigigunikkit paasisinnaavakka, Krissie Winberg Berthelsen oqarpoq.

- Nunarsuarmiooqataaleraluttuinnarpugut, iliuuseqarsinnaaqaagullu. Akeqqersimaarunnaarluta tamatta akisussaaffimmik tigusisariaqarpugut. Tamattami inissaqartariaqarpugut. Allamiunik sulisoqartarneq nunatsinni nutaajuvoq. Isumaqarpungalu amerlasoorpassuit allamiunik sulisoqarnissartik ingerlalluarumallutik eqqarsaatersuutigisaraat. Maannami allamiunik sulisullit amerlasoorujussuupput, ingammik Nuummi. Sutorniartarfinniinnaanngilaq, sumimi tamaani takussaaleraluttuinnarput, Krissie Winberg Berthelsen oqarpoq.

Borgmesteri akisussaaffeqarpoq
Maria, Sunaree, Zara Gangilu isumaqarput inuiaqatigiit nikaginnissanngippata borgmesteri akisussaaffimmik annertuumik tigummiaqartoq.

- Borgmesterip pingaartittariaqarpaatigut. Inuiaqatigiit kajumissaartariaqarpai paasitillugit allamiut tikiinnarlutik tikinneq ajormata, tassami uagut tikittarpugut erinarsortartuugutta, igasuugutta iggarissuulluta. Tikinniarneq maanga ajornaatsuinnaanngilaq, Zara oqarpoq.

Borgmesterillu ilaluarinninnginnissamik oqariartuuteqartareernikuunini erseqqissarpaa.

- Ilaluarinninnginnassamik oqariartuuteqartarnikuuvunga, iliuuseqartarlungalu. Siornaak inuiattut ullorsioratta Katerittarfik Amisuni pikkialaartitsivunga, qulequtaralugu uummatitsinnit oqaatsit. Tassanilu sumiorpaluutsinik assigiinngitsunik oqaluttut oqaaseqarteqattaarpagut, aammalu nunat allamiut ilitsoqqussaminnik oqaatsitik atorlugit oqaaseqartittarlugit. Ataqqeqatigiilluni ilisareqatigiinnerunissaq nunaqqatigiinnissamik siunertallit taamaattut suliniutigisarsimavakka oqariartuutigalu ersarissoraara, Asii Chemnitz Narup naggasiilluni oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER