Tele: Taamaattumik internet attaveerukkaluarpoq

Tele aqqutigalugu internettimut attaviit ullumi tallimanngornermi ullaap tungaa attaveerukkaluarput. Maannali tamarmik naliginnaasumik ingerlaqqilerput

Qarasaasiat atortuat pissutaalluni attaveerukkaluarpoq. Assi.: Polfoto/Thomas Borberg

Qarasaasiat atortui pissutaallutik tallimanngornerup ullaap tungaa interneti, Iserfik, nuna tamakkerlugu TV, KNR FM Nuup avataanut aamma mobildata sivikitsumik attaveerukkaluartut, Tele ilisimatitsivoq.

- Tamatumunnga pissutaavoq qitiusumik IP-route-imut atortut softwarit akornuteqalernerat. Routerip suliassaraa datanik ingerlatitseqqiisarneq, taassumalu nal. 10:32 akornuteqarlernera pisuulluni kiffartuussinermut atortut arlallit eqqorneqarput, teknikkimut pisortaagallartoq Kim Schwartz oqarpoq.

Ajoqut erngerlugu paasineqarpoq nalunaaquttallu akunnerata affaata ingerlanerani attaviit naligiinnaasumik ingerlaqqilerput.
TELE-POST-ip misissorpaa routerip ajutoorneranut suna pissutaanersoq.

Powered by Labrador CMS