Tele-Post: Umiarsuaq kabelinik iluarsaassisussaq Qaqortumukassaaq
Sisimiut avannaani sikoqarnera pissutigalugu kabelinik iluarsaassinissaq ajornarallarpoq, tamannarpiarlu pissutigalugu umiarsuaq iluarsaassisussaq sapaatip akunnerata naanerani Nuummiit Qaqortup tungaanut aallassaaq
Pilersaarutit naapertorlugit ingerlasoqassappat iluarsaassineq marlunngorpat marsip 19-ani 2019-mi aallartinneqassaaq.
Tele-Post tusagassiutinut nalunaarummi allappoq.
- Iluarsaassineq aallartippat kujataani internettimut attaveqaatit tamarmik qaminneqassapput. (Paamiuniit Narsaq kujalleq ilanngullugu), ilisimatitsissutigineqarpoq.
Oqarasuaatit, mobilikkut attaveqaatit, sms-nik nassitsisinnaanerit, TV-mut radio-mullu attaveqaannassaaq. Atuisulli attaveqaatit pitsaannginnerunissaat naatsorsuutigisariaqassavaat. Naatsorsuutigineqassaaq iluarsaassineq ullut 15-nit 20-llu missaannik sivisussussuseqassasoq.
Attaveqaatit killilimmik piginnaaneqarallarnissaasa nalaani inuiaqatigiinni sullissiviit inuussutissarsiorlunilu ingerlatsiviit naliginnaassumik sulisinnaanissaat pingaartinneqassaaq, Tele-Post ilisimatitsivoq.
- Kujataani attaveqaatit matoqqanerisa nalaanni sullitavut internettimut akiliuteqassanngillat. Aningaasat utertoorutissat qanoq amerlatiginissaat kabelinik immap naqqatigoortunik iluarsaassineq naammassineqarpat aalajangerneqarumaarput, Tele-Post nalunaarpoq.
Iluarsaassineq pilersaarutit naapertorlugit ingerlassappata kujataani kabeli immap naqqatigoortoq aprilip aallartinnerani iluarsisimanissaa naatsorsuutigineqarpoq. Sikullu pissusaa naapertorlugu umiarsuaq avanamukaqqissaaq, Sisimiut avannaani kabeli iluarsaakkiartorlugu.