Tele-Post: SMS-it tamarmik nassiunneqarput

Melodi Grand Priximut taasinermi suna tamarmi ajunngitsumik ingerlasimasoq Tele-Post naliliivoq

Tele-Postip maanna systemit misissorsimalerpai, arfininngormallu ualikkut Melodi Grand Priximut taasisoqarnerani suna tamarmi ajunngitsumik ingerlasimasoq, tassanngaannit nalunaarutigineqarpoq.

- Atortutsinni ajoquteqartoqaranilu attaveeruttoqarsimanngilaq. SMS-it 1212-imut atatillugu ingerlateqqittarpagut, tassanilu pissusissamisut ingerlasimavoq, attaveqaqatigiinnermi sulisoq Paarnaq Hansen Sermitsiaq.AG-mut taama oqaluttuarpoq.

Aallakaatitap naammasseqqammernerani Kalaallit Nunaannit isiginnaartorpassuit qisuariarput, taasinerup nalunaarsorneqarsimaneranut uppernarsaammik pinnginnertik pissutigalugu. Tele-Postip atortut ajoquteqarsimanersut erngertumik misissorpaat. Kisianni taamaattoqarsimanngitsoq maanna naqissuserneqarsinnaavoq.

DR-ip atortutik aamma misissoqqissaarpaat, tassanilu aamma taasinerit tamarmik nalunaarsorneqarsimasut oqaatigineqarpoq. SMS-ikkut kingusissukkut akinerit, taasinerup nalaani atortut akornusinnginnissaanik pissuteqarpoq.

Powered by Labrador CMS