Tele-Post: Nanortalimmi eqqaanilu attaveqaatit atassuteqaleqqipput

Attaveqaatit pingasunngornerup unnukkuani ikinneqaqqittut nalunaarutigineqarpoq

- Qujanartumik sila pitsaanerulermat aamma teknikerit suleqatigiit pikkorissut pilersaarusiorluakkamik Sermeq Helicopters peqatigalugit sulinerisigut, pingasunngorneq ualilluinnartoq radiokædeqarfimmut anngussinnaasimavugut, ajoqutillu aaqqissuullugit, radiokædemili misileraangaatsiareerluta aatsaat attaveqaatit tamarmik aaqqinneri qularnaarsinnaasimavarput, nalunaarutigalugulu.

Tele-Postimi upalugaarsimanermut pisortaq Kim Hammond Zinck suliffeqarfiup nittartagaanut oqarpoq.

Pingasunngormat ullup qiteqqunnerani atassutaaruttut, ulloq taanna unnuinnartoq tamarmik atassuteqaqqilerput. Marlunngornermi kalerrisaarut tutsiuppoq, ajoquteqartoqarnera peqqutigalugu innaallagiaaruttoqassasoq.

Teknikkerit aaqqissuiartortussat helikopterimi piareersimareersimagaluarput, kisiannili silarluk peqqutigalugu Qaqortumiit radiokædeqarfinnut, innaallagiaarullutik tamanik atassutaarutitinnginneranni, aaqqissuiartorlutik ingerlariaqqissinnaasimatik.

- Teknikkerit suleqatigiissussat piareersimasimapput, atuisartuvullu toqqaannartumik ilisimatippavut atassuteqaatit attaveerunnissaannik. Naak silarlunnera peqqutigalugu unammilligassaqaraluaqisoq, suliassaq naammassilluaratsigu tulluusimaarutigaara, Kim Hammond Zinck oqarpoq.

Powered by Labrador CMS