Tele-Post: Kabeli alla kittoraqqasoq paasineqarpoq
Kabelip iluarsaanneqarnerani paasineqarpoq allamik kittorartoqarsimasoq, Tele-Post ilisimatitsivoq
- Sisimiut avannaatungaani 70 kilometerisut ungasitsigisumi immap naqqani kabeli kittorarsimasoq. Kabelip kittorarnera sumik peqquteqarnersoq suli ilisimaneqanngilaq.
Tele-Post tusagassiutinut nalunaarummi allappoq.
Kittorarnerit pingasut
Immikkut ilisimasallit IT Telecomimeersut peqatigalugit qanoq pisoqarsimanersoq maannakkut misissorneqarpoq.
- Immap naqqaniittup kabelip kittorarnera avannaani atuisut internetiat arriitsuaraassaaq attaviit Aasianniit Sisimiunut sakkortusaavikkoormata. Takorlooruminaalluinnaraluarpoq immap naqqaniittut kabelit pingasut ataatsikkut ajutoorsinnaasut kisianni pissutsit piviusut massakkorluinnaq taamaapput. Sulisut immikkut ilisimasalinniit ikiorteqarlutik ajutoornerit marluk kingulliit sapinngisannguartik tamaat sukkanerpaamik iluarsiniarsaraat, pisortaaneq Kristian Reinert Davidsen tusagassiutinut nalunaarummi oqarpoq.
Umiarsuup suliassani siulleq naammassereerpaa, Sisimiut avannaatungaani kabeli ajutoorsimasoq sumiiffimmi sikuunera pissutaalluni iluarsaakkiartorneqarsinnaanngikkallarpoq.
Silarluppoq
- Sisimiut avannaani sikoqartupilussuuvoq aamma qularnarpoq piffissami qanittumi allanngortoqarsinnaanissaa. Kujataani silap pissusaata takutippaa ulluni tulliuttuni anorersuassasoq taamaattumik Qaqortup avataani umiarsuaq iluarsaassiniartorsinnaanngikkallarpoq. Taamaattumik umiarsuaq Nuummukassaaq avannaani kujataaniluunniit sila aaqqissiiaartorlugu. Sila apeqqutaalluni umiarsuaq avannamut kujammulluunniit immap naqqaniittumik kabelimik iluarsaassiartortinneqarumaarpoq, Tele-Post ilisimatitsivoq.