Tele-Post
Tele-Postip mobilimik atuisut sukkanerusunik atugassaqartilerniarpai
Tele-Postip ukiuni pingasuni tulliuttuni periusissani saqqummiuteqqammerpaa. Suut pitsanngoriaatissatut naatsorsuutigineqarsinnaanersut takukkit
Ingerlatseqatigiiffiup Namminersorlutik Oqartussanit pigineqartup Tele-Postip, kalaallit inuiaqatigiit oqarasuaateqarnikkut, allakkatigut internetikkullu pitsanngoriaatissat arlallit naatsorsuutigisinnaaneraat marlunngornermi saqqummiuppai.
Periusissiami anguniakkat aalajangiunneqartut anguneqassanersut siunissap takutikkumaarpaa, kisianni anguniakkat annertupput.
Sukkassutsimik marloriaatinngortitsineq
Ingerlatseqatigiiffik immap naqqatigut kabelimik atuisunut sukkanerusumik atuilersitsiniarluni anguniagaqarpoq. 2017-imi 30 Mbit/S anguniarneqarpoq, ukiullu tamaasa 10 Mbit/S-imik 2020-ip tungaanut qaffattassaaq, piffissami tassani taamaalilluni 60 Mbit/S anguneqassalluni.
Aammattaaq 2018-imi Kalaallit Nunaat tamakkerlugu 4G-ertoqarsinnaanissaat naatsorsuutigineqarpoq.
2017-imi uku ukkatarineqarniarput:
- Imaatigut kabeli Maniitsumut, Sisimiunut aamma Aasiannut tallineqassaaq.
- Radiokkut attaveqaatit Aasianniit Qasigiannguanut Ilulissanullu sakkortusineqassapput.
- Radiokkut attaveqaatit Uummannamiit Upernavimmut tallineqassapput.
- Illoqarfinni pineqartuni attaveqaatit pitsanngorsarneqassapput.
2018-imi uku ukkatarineqassapput:
- Radiokkut attaveqaatit Nuup kujataaniittut nutarterneqassapput.
- Oqarasuaatinut angallattakkanut attaveqaatit tamarluinnarmik nutarterneqassapput, aamma 4G-p Kalaallit Nunaat tamakkerlugu atuutilersaaq. Atuisup misigisassaa tassaassaaq aalaakkaanerulerneq, oqaloqatiginninnermi nipip pitsaassusaa qaffasinnerusoq aamma data sukkanerusoq.
Oqarasuaatit nalinginnaasut atorunnaarsikkiartorneqassapput
Oqarasuaatit nalinginnaasut nunaqarfinni aamma illoqarfinni mikinerusuni atorunnaarsikkiartuaarneqassasut, oqarasuaatinik angallattakkanik aamma mobildatamik taarserneqassallutik, nalunaarusiami ilisimatitsissutigineqarpoq.
Isumaqatigiissutit pitsanngorsakkat, teknologi nutaaq aamma nunat tamalaat akornanni issittoq pillugu suleqatigiinnermut peqataaneq aqqutigalugit qaammataasanik atuisoqarfinni internettikkut kiffartuussissutit pitsanngorsarneqassapput.
Teknikkikkut atortut pisoqalisoortut atorunnaarsikkiartuaarneqarnissaat 2019-imiit 2020-mut annertunerusumik aallunneqassaput, Tele-Postip systemiinik erseqqinnerulersitsillunilu assigiissaarinerunissamik kinguneqartussamik.
Atuisoq qitiutillugu
Suliffeqarfiit allat assigalugit Tele-Postip atuisut qitiutinnissaat neriorsuutigaa. Ingerlatseqatigiiffiup immikkoortut sisamat saqqummiuppai:
- Tunisassiat ikinnerusut kisianni siunnerfilikkat, atuisumut pingaarutilimmik nalillit.
- Imminut sullinnissamut periarfissat arlaqarnerusut, atuisumut piuminarlutillu pisariitsut.
- Akinik pitsaassutsimillu ingerlaavartumik pitsanngorsaaneq.
- Ataatsimoortumik aaqqiissutit pisariitsut.
Atuisut iluarisimaarinninnerat pitsanngortinniarlugu anguniagaqarlutik, tamatumalu saniatigut sulisut suliffimmik nuannarinninnerat ajorseriannginnissaat anguniarlugu, suliffeqarfik ilisimatitsivoq.
Allakkanut tunngatillugu atuisunut poortukkanik sukkanerusumik tunniussisalernissaq ukkatarineqartoq ilisimatitsissutigineqarpoq. Tassami nittartakkakkut niuerneq annertusiartorpoq, taamaalillutik nassiussat sukkasuumik isumannaatsumillu sullitanut apuussinnaaqqullugit suliffeqarfimmut nutaanik piumasaqaatinik pilersitsivoq.