Tele-Postip atortui seqqortaaffigineqartarsimasut
Tele-Postip nunami sumiiffinni assigiinngitsuni naaparutaatai atortuilu ataasiaannarani arlaleriarlunili seqqortaarfigineqartarsimapput. Taamaaliortoqartarnera sulisunut ulorianaannarani attaveqaatinik aamma ajoqusiisinnaavoq, Tele-Postimit oqaatigineqarpoq.
Tele-Postimi aallakaatitsisarnermut immikkoortortaqarfimmi sulisut ukioq manna juulip qaammataata naanerani Qeqertarsuarmi Uunartuarsuup qaqqaata qaavani sakkortusaavimmik misissuiartorlutik qaqingamik nuanninngitsumik takusaqarsimapput, tassami sakkortusaaviup illutaa taassumalu eqqaani atortut aallaammik seqqortaarfigineqarsimapput.
- Taamatut nuanninngitsumik seqqortaartoqarnerani ajornerpaaq takorlooruminaannerpaarlu tassaavoq, teknikerit sakkortusaavimmiinneranni seqqortaarneq pisimasuuppat inuup inuuneranik ulorianartorsiortitsisumik inummik eqqusisoqarsimasinnaanera.
- Qujanartumilli massakkut taamatut pisoqarsimanngilaq, Aallakaatitsisarnermut immikkoortortaqarfimmi pisortaq Kim Hammond Zinck oqaluttuarpoq.
Serlersaarisimanerit arlaliusut
Tele-Postimi teknikkeqarfimmi pisortaq Jonas Hasselriis Sermitsiaq.AG-mut oqaluttuarpoq, aatsaat taamatut pisoqalinngitsoq.
- Tamanna takusareerparput, soorunami attaveqaatit suliarisimasat seqqortaarfigineqarsimasut takullugit tupannartarpoq, ajorluinnartumik pisoqarsinnaanera ernumaammernartarpoq, taanna oqarpoq.
Uunartuarsuup qaqqaani pisimasoq suliffimmi saqqummiunneqarmat, Qasigiannguani sakkortusaavik aamma seqqortaarfigineqarsimasoq pillugu assit saqqummiunneqarput. Seqqortaartarnerup saniatigut Tele-Postimit aamma misigineqarsimavoq, Maniitsumi meeqqat telep napparutaataanut qallortarnerat.
- Siullertut meqqaat ajoqusersinnaapput, aamma atortut ajoqusersinnaapput, taamalu attaveqaatit atorsinnaajunnaarlutik, pisortaq oqarpoq.
Meeqqat oqaluunneqarlik
Tele-Post kusanaattumik pissusilersortoqarsimatillugu allagartalersuilluni allatigullu iliuuseqartarpoq, angajoqqaalli tassaapput meeqqaminnik oqaluussisussat, Jonas Hasselriis erseqqissaavoq.
- Nunami attaveqaasersuinerit ataqqineqarnerunissaannut kaammattuerusuppugut. Serlersaarinermi atortutsinniluunniit pinnguarnermiu ajorluinnartumik pisoqassappat attaveqaatit ajornerulinngikkunik atorsinnaajunnaarsinnaapput.