Mobilikkut attaveqaatit
Tele-Postip akit appartippai
Suliffeqarfiup Namminersorlutik Oqartussanit pigineqartup mobiltelefonit atornerinut akit 11 millionit koruuninik appaavigai
Tele-Post atorlugit mobiltelefonit atorlugit oqaluussinerit paasissutissanullu atuinerit akii tamaasa 11 millionit koruuninik appaavigai.
Mobil Mikisoq aamma Tusass akikilliliiffigineqarnerpaasut, suliffeqarfiup Namminersorlutik Oqartussanit pigineqartup nalunnaarutigaa.
Data annertunerusoq
Aammattaaq Tele-Postip mobilpakket imai annertusivai, taamaalilluni Mobil Mikisup qaammammut 75 megabytenik ilaneqarnera, aammalu Mobil Akulliup aamma Angisuup imaasa marloriaatinngortinnerat nutaarsiassaapput.
Tele-Postip tamanna iluatsillugu mobildatanut aamma mobilt bredbåndimut sukkassutsit sumiiffinni periarfissaqarfiusuni tamani qaffatsinniarlugit aalajangerpaa. Sumiiffinni amerlasuuni mobilit attaveqaataat tamakkiisumik atorneqareerpoq, illoqarfinnili 3G-mik aamma 4G-mik atuiffiusuni sukkassusissaq ullumikkut killilerneqarsimavoq.
Atuineq annertuneq
- Mobilinut nioqqutitsinni akinik appartitsineq mobiltelefoneqarnermik atuinerup qaffakkiartuinnarnerata kinguneraa. Akinik appaartitsinerit innuttaasut sullitagut aammalu inuussutissarsiummik ingerlatallit sullitagut iluaqusertussaavaat. Mobilinut nioqqutigut aammattaaq sukkanerulersittussaavagut, sullitagut suli pitsaanerusumik atugassaqartinneqalissallutik uagullu attaveqaatitsinnik atorluaanerulissalluta, Tele-Postimi pisortaaneq Søren Lennert Mortensen tusagassiorfinnut nalunaarummi erseqqissaavoq.
Akuerineqartoq
Nalunaarasuartaateqarnermi aqutsisut akit nutaat akueraat, sapaammi 1. november 2015 atuutilerlutik. Sukkassutsit nutaat ullumi atuutilerput, tassalu ataasinngornermi ulloq 2. november 2015.
Tele-Post mobiltelefoneqarnermut akinik kingullermik appartitsivoq 2014-imi aprilimi. Taamani aningaasat katillutik appaassutaasut 10 millionit koruuniupput.