Tele-Postimi pisortaq aatsitassarsiorfiup siulersuisuini ilaasortanngussasoq
Tele-Postimi aningaasaqarnermut pisortaq Line Frederiksen, Kujataani aatsitassarsiortup AEX Goldip siulersuisuini ilaasortassatut innersuunneqarsimavoq.
Line Frederiksen ukiut marluk matuma siornatigut Tele-Postimi naatsorsuusiornermi pisortaasoq aningaasaqarnermi pisortanngortinneqarpoq, ukiullu marluk ingerlareersut siulersuisuni ilaasortatut atuuffeqalernissaa ilimanarluinnarluni.
Canadamiut aatsitassarsiorfiutaata AEX Goldip tusagassiorfinnut nalunaaruteqarluni ilisimatitsissutigaa, Line Frederiksen juunip qulingiluaani ileqquusumik ataatsimeersuarnermi siulersuisuini ilaasortassatut innersuussutigineqarniartoq.
AEX Gold ingerlatseqatigiiffiuvoq Nalunaq A/S-imik ingerlatsisuusoq, taanna Nalunami kuultinik piiaanissamut akuersissuteqarpoq kiisalu Kujataani sumiiffinni 3000 kvadratkilometerit sinnerlugit annertutigisuni kuulteqarnersoq misissuinissamut akuersissuteqarluni.
Aningaasaliiffigineqangaatsiarsimasoq
Aatsitassarfiorfimmut aningaasaliissutigineqarsimasut ukiup ataatsip matuma siornatigut 357 millioner koruuninik annertusineqarput. Vækstfonden Greenland Venturelu aatsitassarfiorfimmut aningaasaliissuteqaqataasimapput.
Line Frederiksen naatsorsuuserinermi aningaasaqarnermillu aqutsinermi HD-tut ilinniarsimasuuvoq kiisalu aamma økonomistyringimi kiisalu ilinniagaraa Cand.merc.ibe-tut (International Business Economics) ilinniagaqarluni, aamma 2007-mi ilinniakkani naammassigamiuk nunatsinnut ingerlaannaq angerlaqqinniarluni aalajangersimalluni, Tele-Postip nittartagaani innresuussinermut atatillugu allassimavoq, tassani aamma ilanngullugu ilisimatitsissutigineqarpoq, Steen Montgomery-Andersen aningaasaqarnermut pisortatut ukiuni 14-ini sulereerluni suliunnaarsimasoq.