Tele-Posti qaqqat qaavini illuaqqanik sanasoq
Tele-Posti nammineq periutsini atorlugu illuaqqanik sanavoq. Airbnb-imilli neqerooruteqarnissaa ilimagineqassanngilaq.
Tele-Postimi teknikerit sakkortusaaveqarfiit iluarsaatileraangamikkit atukkanik inuulluataartitsinerusunik qilanaaruteqarsinnaanngorput, sakkortusaaveqarfiit nalinginnaasumik qaqqat qaavaniittarput helikopterinillu kisiat orninneqarsinnaasarlutik.
Manna tikillugu teknikinut, generatorimut atortunullu allanut quimi unnuisarsimapput. Maanna teknikerit illuaqqanik inuulluataartitsinerusunik qilanaartuuteqalersinnaanngorput, Tele-Postip aamma AK Montagep peqatigiillutik pilersitaannik.
Unnuinermi atukkat pitsaanerusut
- Iluarsaaneq akunnermik ataatsimik affarmillu aamma ullut arlallit akornanni sivisussuseqarsinnaasarpoq. Qaqqat taakua qaavini sila allanngorartupiluusarpoq. Teknikeritsinniit kakkaqisuniit unnuinermi atugaat pitsaanerulissasut sivisuumik kissaataasimavoq, Sermitsiaq.AG-mut Tele-Postimi pisiortornermut pisortaq Milan Vraa ilisimatitsivoq.
Maani suliassinneqartartoq AK Montage peqatigalugu illuaqqanik immikkoortut marlukkaartunik sananissaq iluatsissimavoq, tamarmik immikkut kvadratmeterinik tallimanik angissuseqarput. Immikkoortortat tamarmik glasfiberit, saviminermik qajannaallisakkat, helikopterip kivissinnaasaanik oqimaassuseqarput (800-900 kg-t), qaqqallu qaavini immikkoortortat tamarmik saviminermit toqqavimmut ikkussuunnissaat artornanngillat.
Siniffiit quleriit
Immikkoortut taakkua marluk ataatsimut ikkussuunneqassapput annertussusaallu katillugu 10 kvadratmeteriupput, sisamanik quleriinnik siniffeqarpoq, igaffik, nerisarfik perusuersartarfillu kuuffittaqanngitsoq. Suna tamaat fabrikkimiit ikkussuunneqareerpoq – kallerup inneranut ikkuffiit, LED-mit qaammaqqutit, kiassaatit il.il. piareeqqareerput. Nalaasaarfilersorneqarlutillu igaffilersorneqaannassapput.
- Sulinermi avatangiisit sulisunullu isumannaassuseq siuarsaratsigut tulluusimaarutigaara, aammattaaq nunatsinni atugassarititaasunut aaqqiissutinik nassaarsinnaagatta pitsanngorsarlugillu tulluusimaarutigaara. AK sulisuilu piginnaaneqarnertik atorpaat suliassarlu suliarilluarpaat, pisiortornermut pisortaq ilisimatitsivoq.
Ukioq manna illuaqqanik marlunnik ikkussuineq iluatsippoq. Kap Tycho Brahep eqqaani, Tasiilap kujataata-kippasissuani aamma Pingels Fjeldimi Tasiilap avannaata kangiani.
Aappaagu illuaqqat tallimat
- 2020-mi pilersaarpugut illuaqqanik nutaanik tallimanik pilersitsiniarluta. Sakkortusaaveqarfitsinni tamani atugassarititaasut aaqqissuunneqarnissaat ukiunik arlalinnik sivisussuseqassaaq, 70-inik sakkortusaaviuteqarpugut, Milan Vraa nassuiaavoq.
AK Montage, Tele-Postip siornatigut suleqatigisimasaa, oqaloqatigineritigut illuaqqanik sananermut najoqqutassanik pilersitsisimapput Issittumi atukkanut imaannaanngitsunut tulluarsakkanik. Ilutigalugulu aaqqiissut akikinnerulersimavoq, pisiortornermut pisortaq ilisimatitsivoq.