Tele-Post ukiup affaani siullermi miliuunilikkaanik sinneqartooruteqartoq
Tele-Post 2020-mi ukiup affaani siullermi akileraarutit suli ilanngaatiginagit naatsorsuutimini 64,7 millioner koruuninik angusarissaarpoq. Angusat siorna 2019-imi ukiup affaani siullermi angusanut sanilliullutik 15,5 millioner koruuninik amerlanerupput siornami imaatigut kabelimik aaqqissuussineq qaavatigut aningaasartuuteqartitsisimammat.
Tele-Post Namminersorlutik Oqartussanit pigineqartoq 2020-mi ukiup affaani siullermi akileraarutit suli ilanngaatiginagit naatsorsuutimini 64,7 millioner koruuninik angusarissaarpoq.
Ingerlatseqatigiiffik tusagassiorfinnut nalunaaruteqarnermi ilisimatitsivoq.
Tele-Postimit immikkut naammagisimaarneqarpoq, Tusass internettimik nioqqutit akiinik 27 %-it angullugit akikilliliisimaneq:
- Akikinnerulersitsineq sullitanit assut tigulluarneqarsimavoq. Akinik appaasoqareersorlu pingaartumik nunaqarfinni sullitat amerleriarujussuarput.
- 2019-ip aallartinnerani nunaqarfinni Tusass Flatrate internetimik atuisut 34%-iusimasut ullumikkut 47%-inngorsimapput, Tele-Post allappoq.
Siulersuisuni siulittaasoq tulluussimaartoq
Siulersuisuni siulittaasup Stine Bossep taamatut ineriartortoqarnera naammagisimaarpaa:
- Digitalinngorsaanermik sukkalisitsisumik nunamut tamarmut nioqqutinik amerlanernik neqerooruteqarsinnaanerput tulluusimaarutigaarput, taanna oqarpoq.
Tele-Post coronap ajornartorsiortitsineranit sakkortuumik eqqugaasimanngikkaluartoq, ingerlatseqatigiiffiup tuniluuttoqarnera malugisimavaa, nunani allani sullitat roamingimik atuinerannit isertitakinnerusimagami.
Tele-Post naapertotlugu isertitakinnerusimaneq allaffissonrermi aningaasartuutinik sipaarniuteqarnikkut naligiissinneqarsimavoq.
Coronap ajornartorsiortitsinera Tele-Postimut aamma sunniuteqarsimavoq
- Covid-19-ip ajornartorsiortitsinerata TELE-POST-imik eqquinerlunneri pingaartumik tassaasimapput nunani tamalaani pilersuisorisat kinguaattoortarneri kiisalu allakkanik nassiussanillu kinguaattoortoqartarnera, ingerlatseqatigiiffik allappoq.
Tamatuma saniatigut Tele-Postimit sullitat ilaannut modeminik tunniussiniarnertik maannakkorpiaq ajornartorsiutigaa, tamannalu coronap ajornartorsiortitsneranit pissuteqarpoq:
- Tamanna unammillernartoq sullissatta iluaqutissaannik aaqqiissuteqarfiginiarlugu ilungersorluta maanna sulivugut, taamaattorli aamma paasisariaqarput nunarsuarmi arlaannattaluunniit siulittuuteqarfigisinnaanngisaanik immikkut illuinnartumik maanna inissisimavugut, Tele-Postimi pisortaaneq Kristian Reinert Davidsen oqarpoq.
2020-mut ukiumut naatsorsuutini 100-120 millioner koruuninik angusaqarluarnissani TELE-POST-ip naatsorsuutigaa. 2019-imi angusarisimasat annertoqqataannik, tassa 120,1 millioner koruuninik angusaqarsimagami.