Skip to main content

Tele-Post sinneqartoorutikinneruvoq

Ukiup qaammataani siullerni qulingiluani suliffeqarfik kisermaassisoq siorna taamaalineranimut sanilliullugu 38 million koruuninik kinguariaateqarpoq. Suliffeqarfiup inuit sullittagai internetimik annertunerusumik atuinerulersimapput

Tele-Postimit ileqquungaluarpoq sinneqartoorutit annertuut uteqqiattumik saqqummiunneqartarneri.

Aamma suliffeqarfik kisermaassisoq ataasinngornermi sinneqartoorutinik ukiup qaammataanut siullernut qulingiluanut saqqummiussaqarpoq - naak sinneqartoorutit 2013-imi taamaalineranut sinneqartoorutinut sanilliunneqarsinnaanngikkaluartut.

Tele-Postip akileraaruteqannginnermi naatsorsuutitigut angusai 2014-imi kvartalimit siullermit pingajuannut 60,5 million koruuniupput 2013-imi piffissamut assinganut sanilliussilluni taamani 84,4 million koruuniusut. Tassa 23,9 million koruuninik kinguarfiuvoq.

Immap naqqatigut kabelimik 2013-imi iluarsaassinermut immikkut ittumik aningaasartuutit ilanngunnagit, taava naatsorsuutitigut angusani kinguariaatit eqqortut akileraaruteqannginnermi 38 million koruuniupput, taama Tele-Postimi pisortaanerugallartoq Steen Montgomery-Andersen ilisimatitsivoq, taannalu nassuiaavoq akigitinneqartunik annertuumik appartitsineq naatsorsuutitigut angusat ikileriaateqarnerannut patsisaanerpaasoq: 

- Siunissamut iliuusissatut pilersaarutitta “Sassarta 2014-18” atuutsikkiartornera ingerlatiinnarparput. Sullittakkat qitiutippavut nioqqutissanut nutaanut, akigititanut appasinnerusunut aamma IT-mut atortunut nutaanut sullittakkanut sammisunut annertuumik aningaasaliinikkut, tassa suliffeqarfik pitsanngorsarniarlugu tamatumunngalu ilutigitillugu sullittakkat pitsaanerusumik sullinniarlugit. 

- Tamakku saniatigut annertuumik atuivugut internetip aamma datanik ingerlatsinerup tamanut ammanerulernissaanik piareersaanermut, Montgomery-Andersen tusagassiuutinut nalunaarummini taama allappoq.

Internetimik atuineq annertusisoq
Tele-Postimit ilisimatitsissutigineqarpoq inuit sullittakkat internetimik atuinerat ukiup kingulliup ingerlanerani 65 procentimik annertusisimavoq akigitinneqartut appasinnerusut aamma nioqqutit nutaat pissutaallutik. 2014-imi kvartalimit siullermit pingajuannut kaaviiaartitsineq 5,1 million koruuninik annertusivoq 2013-imi piffissamut assinganut sanilliussilluni.

Aamma suliffeqarfiit sullittakkat internetimik atuinerat annertusiartorpoq, kisianni akigititanit appartitsineq 1. juuni atuutilersinneqartup kinguneraa kaaviiaartitsinerup appariaateqarnera. Kvartalimit siullermit pingajuannut kaaviiaartitsineq 5,4 million koruuninik appariarpoq 2013-imi piffissamut assinganut sanilliussilluni. 

Ukioq manna qaammatit siulliit qulingiluat ingerlaneranni immap naqqatigut kabeli aqqutigalugu internetimik atuineq 70 procentit missaannik annertuseriarsimavoq. 

Tele-Postip kvartalimut nalunaarusiaa pdf-nngorlugu allaaserisami atuaruk

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER