Tele-Post satellittet nutaat pillugit: Iluatsissanersut takoqqaassavarput
Illuaqqamiit silap qanoq innissaanik ilimasaarut nittartakkakkut takusinnaalingajalerpat. KNR-imit nutaarsiassaq qiimmaallannartoq ataasinngornermi atuarneqarsinnaavoq. Ajoraluartumilli taama ajornanngitsiginngilaq, Tele-Postimi attaveqatigiinnermut pisortaq Julie Rademacher Sermitsiaq.AG-mut nassuiaavoq.
KNR ataasinngornermi allaaserinnilluni allappoq nuna tamakkerlugu internet atulingajalersoq. Tassami qaammataasanik attaveqatigiinnermillu nioqquteqartoq OneWeb qaammataasanik nutaanik 36-inik avataarsuani attaveqaateqalerput. Qaammataasat taakku nunarsuup avannarpasinnerpaani internetimik attaveqaateqalersitsissapput.
- Nunami attaveqaatinik tuniniaasut suleqatigineratigut kalaallinut neqeroorutaalissaaq, OneWebimi tuniniaanermut attaveqaqatigiinnermullu pisortaq, Tabitha Aldrich-Smith KNR-imut oqarpoq.
Pilersaarulli iluatsissappat Tele-Post isumaqatigiissusiorfigineqaqqaartariaqarpoq. Tele-Postimi nunatsinni kisiartaalluni internetimik neqerooruteqartuuvoq. Tamassuma kingorna atortorissaarutit misilittarneqartariaqarput, iluatsinnersut paasiniarlugit.
- Qaammataasat atorlugit attaveqaateqarnerit pillugit misilittakkagut ilaatigut pitsaasuupput, aammali ilaatigut pitsaasuusarnatik. Taamaattumik uku iluatsinnersut takoqqaarusuppagut peqataanerulinnginnitsinni, Julie Rademacher oqarpoq.
Pitsaasuussaaq akikillunilu
OneWeb KNR-imut oqarpoq Kalaallit Nunaat tamakkerlugu internetimik sukkasuumik novemberimi neqeroorsinnaalissallutik. Taamali pilertortigisumik suliat ingerlanissaat naatsorsuutigineqarsinnaagunanngilaq.
Tele-Postimi erseqqissarneqarpoq qaammataasat atorlugit attaveqaatit qanoq sukkatigisinnaaneri qanorlu akeqarsinnaaneri maannakkorpiaq oqaatigineqarsinnaanngilaq. Taamaammat Tele-Post suliniummut suli peqataanerulinngilaq.
- Atortorissaarutitigut pitsaasutut aaqqiissutaannaanissaa ukkatarinngilarput. Atortorissaarutit atorneqartut tatigilluinnarpagut, tamannalu naatsorsuuteqarfigilluarlugu malinnaavigissavarput. Neriuutigaarpulli qaammataasat atorlugit attaveqaasiinerit pitsaasuuinnassanngitsut, aammali sullitsinnut akikinnerussasut, nioqquteqarnermi pisortaq Flemming Drechsel oqarpoq.
Qaammataasanik neqerooruteqartut arlallit attaveqarfigineqarput
Tele-Postip uppernarsarpaa sullitat qaammataasakkut internetimut attaveqartut pillugit OneWeb maanna oqaloqatigalugu. Atortorissaarutit iluatsinnersut takoqqaarlugit neqeroorut annertunerusoq aatsaat aalajangiiffigineqarumaarpoq.
- Neqeroorut sullitatsinnut sukkanerusumik interneteqarnissaat angusinnaajumallugu akitigut ullumikkornit aamma naleqquttariaqarpoq. Atortorissaarutit nutaat akiinut sanilliutissagaanni annertunerujussuarmik internetertitsisinnaasariaqarput. Tamanna suli qulakkiinngilarput, taamaattumik maannakkorpiaq oqaatigisinnaanngilarput OneWeb Tele-Postimut qaammataasanik niuertuulerumaarnesoq, Flemming Drechsel oqarpoq.
Qaammataasat atorsinnaassappata nunami attaveqatigiissutissanik aamma ikkussuisoqartariaqarpoq.