Tele-Post qullersaqarfimmi taarsiivoq
Tele-Postimi pisortaanerup tullersortaa Steen Montgomery-Andersen ingerlatseqatigiiffimmi ukiut 14-it sulereerluni taamaatippoq.
Steen Montgomery-Andersen, pisortaanerup tullersortaatut aamma aningaasaqarnermut pisortatut atorfeqartoq, aggustip aallaqqaataani Tele-Postimi soraarniarpoq, taartissaalu suliffeqarfiup iluani nassaarineqarpoq, naatsorsuuserinermut pisortaq Line Frederiksen maanna toqqarneqarmat.
Ingerlatseqatigiiffimmi Namminersorlutik Oqartussanit pigineqartumi sulisut ullaaq manna kinguaariit nikinnerat pillugu ilisimatinneqarput.
62-inik ukiulik Steen Montgomery-Andersen ingerlatseqatigiiffimmi 2003-imili atorfinippoq, piffissamilu nikiffiusumi pisortaanerugallarnikuulluni.
Suleqat nuannarineqartoq
- Steen ukiorpassuarni Tele-Postimi sulilluarpoq, sulilu taamaappoq. Suleqat nuannarineqartuuvoq, uannut pisortallu sinnerinut siunnersueqataalluartartoq – minnerunngitsumik ukiuni pingasuni kingullerni allannguinerpassuarnut aamma aningaasaliinerpassuarnut suliarisimasatsinnut, pisortaaneq Kristian R. Davidsen oqrpoq.
Line Frederiksen, ullumikkut naatsorsuuserinermut pisortaq, naatsorsuuserinermi aamma aningaasaqarnermik aqutsinermi HD-mik ilinniagaqarpoq kiisalu cand.merc.ibe, taanna 2007-imi ilinniakkaminik naammassigami Kalaallit Nunaannut angerlarniarluni aalajangersimavoq.
- Line Frederiksen ingerlatseqatigiiffimmi ukiuni pingasuni naatsorsuuserinermut pisortatut pikkorissuunerminik aamma piukkunnaateqarnerminik takutitsivoq, taamaalillunilu Steenip atorfianik kingoraarsisussatut tulluarluinnarpoq, pisortaaneq ilisimatitsivoq.