Tele-Post-ip Canadamiut naveerpai
Kalaallit Nunaata annersaani unnuaq nal. 01.30-p aamma nal. 06.00-p akornani piffissaq tamangajaat internetti qameqqippoq. Tele-Post Canadamit paasitinneqarsimanngilaq
Tele-Postip Canadami pilersuisua allanngortiterineri pissutaalluni internetti qaminneraqallarpoq, Tele-Post nittartakkamini allappoq.
Tele-Postip nassuerutigaa, attaveqaatini allanngortiterinerit pitsanngorsaanerillu pisariaqartinneqartarnissaat. Tamatuma saniatigut sullitagut eqqorneqarsimassanngikkaluarput, Tele-Post imaatigut kabelimi ajutooruteqarsimanngitsuuppat.
Akueriuminaatsoq
- Tele-Post-ip, taamalu Kalaallit Nunaanni sullitatta, piffissap sivikitsuinnaap iluani ilisimatinneqarnerat imaluunniit siumut ilisimatinneqanngilluinnarnerat akuerisinnaanngikkipput, pilersuisorisatsinnut uparuaatigissavarput. Pilersuisorisarput oqaloqatigalugu aallartipparput, pissutsillu pineqartut sakkortuumik tassani isornartorsiorneqarput, teknikkimut IT-mullu pisortaq Jonas Hasselriis suliffeqarfiup nittartagaanut oqarpoq.