interneti
Tele-Post internetimik niuernermi unammillerteqalerpoq
Greenland Television ApS Nuummiittoq killeqanngitsumik internetimik neqerooruteqarnissaminut piareerpoq
Internetimik niueruteqarnerup tungaatigut maanna unammillertoqalerpoq.
Tassami Greenland Television, Nuummi tv-pakkinik neqerooruteqartartoq maanna Tele-Postimut toqqaannartumik internetimut tunngasuni unammillertinngorpoq, taanna ingerlatsivik internetimik flatratemik illoqarfiit pingaarnersaanni neqerooruteqassalluni piareerpoq.
Flatrate ilumoortoq
- Matumani taamatut ammanerulersitseqataanerput tulluusimaarutigaarput, tamanna ataasiakkaanut ulluinnarni pingaaruteqartorujussuuvoq, Greenland Televisionimi pisortaq, Jonas Tetzschner, tusagassiuutinut nalunaarummi oqarpoq.
Ingerlatsiviup neqeroorutaa 'flatrate ilumoortuusoq', Greenland Television allappoq. Tassa imaappoq, internetimut attavik aalajangersimasumik sukkassuseqarlunilu akilik - atuineq apeqqutaatinnagu, Tele-Postip flatratemik nioqqutai atuinermut killissamik qaangiigaanni arriillisarput.
Ingerlatsiviup ilisimatitsissutigaa, Nuummi atuisuminnut internetimut nioqqutaasoq.
Atuaruk: Tv-mik neqerooruteqartoq nutaaq aallartinniapiloortoq