Tele-Post iluanaarutimi qaavatigut immikkut 25 mio. kr.-nik tunniusseqqinniartoq

Tele-Post ukiumi coronap atuuffiani 2020-mi ukiumut angusarissaarsimagami iluanaarutimi qaavatigut 25 mio. koruuninik Nunatta Karsianut tunniusseqqinniarpoq.

2020-mi coronap nunarsuarmi tuniluunnera inuiaqatigiinnut akisoorujussuusimanera eqqarsaatigalugu, ilaatigut takornariartitsinermik inuussutissarsiuteqartunut ikiorsiissuteqarsimaikkut, Tele-Post aalajangersimavoq iluanaarutiminit immikkut ittumik 25 millioner koruuninik tunniussiniarluni.

Tele ukioq manna aamma taamatut ilioniarpoq, naatsorsuutigisatullu 87,6 millioner koruuninik sinneqartoorutigisimasami qaavatigut 25 millioner koruuninik tunniussiniarpoq. Suliffeqarfissuaq taamaalilluni 112,6 millioner koruuninik piginnittuminut tunniussissaaq: Namminersorlutik Oqartussanut.

Inissaqartoq

- Aningaasatigut immikkut ittumik tapiissuteqaqqinnissamut inissaqartitsilluta isumaqarpugut. Siulersuisut aqutsisullu ataatsimoorlutik aalajangersimavaat, piginnittunut tunniussaqarnssaq, Tele-Postimi pisortaaneq Kristian Reinert Davidsen Sermitsiaq.AG-mut ilisimatitsivoq.

Immikkut ittumik tunniussinissarsi Namminersorlutik Oqartussanit piumasarineqarsimava?

- Soorunami iluanaarutinik tunniussinissaq pillugu Namminersorlutik Oqartussanik oqaloqateqarpugut. Tunniussinissarli uagut inassutigisimavarput, pisortaaneq ilisimatitsivoq.

2020-mi angusat akileraarutit peereerlugit plus 122,7 millioner koruuniupput, 2019-imi naatsorsuutinit en million koruuninik amerlanerusut. Kisitsisilli pitsaanerusumik angusaqarsimanermit tunngaveqarput, 2019-imimi ingerlatseqatigiiffiit akileraarutaasa appartinneqarsimanerat pissutigalugu 40 millioner koruunit nalingannik akileraarnikinnerusimagatta.

Akileraarutitigut iluanaaruteqanngitsoq

- Ukioq manna ingerlatseqatigiiffiit appasinnerusumik akileraarutaannit naatsorsuutitigut iluanaaruteqartoqassanngilaq, Kristian Reinert Davidsen 2020-mi ingerlatsinermi angusaqarluarsimaneruneq pissutigalugu ukiumut angusarissaartoqarnerusimasoq erseqqissaasoq oqarpoq.

Ukiut kingulliit ingerlaneranni kaaviiaartinneqartartut annikilliartorsimapput, tamanna Kristian Reinert Davidsenip ernummatiginngilaa, ullumikkummi sullitat pitsaanerusunik akikinnerusunillu nioqquteqarfigineqartarput, tamannalu kaaviiaartitanut sunniuteqarsimavoq. Aamma allakkatigut nassiussisarnerit amerlassusaat ukiut kinglliit ingerlaneranni ukiumut 10 procentimik ikilisarsimapput.

Powered by Labrador CMS