misissuinissaq
Tele-Post annertuunik pilersaaruteqarpoq
Suliffeqarfiup Tele-Post-ip oqaluttuarisaanerani pisariaqartitanik misissuineq annerpaaq ingerlatissavaa
Atuisut nalunaarasuartaatitigut attaveqaateqarnermi pisariaqartitaasa suunerinik paasisaqarnissaq misissuinikkut anguniarneqartoq tusagassiutinut nalunaarutigineqarpoq.
Misissuinermi angusat nioqqutinik ineriartortitsinermut toraagaqarnerusumut atorneqassapput.
- Iliuusissatut pilersaarutitsinnut nutaamut ’Sassarta 2014-18’-imut tunngatillugu, Tele-Post-ip qanoq iliorluni inuiaqatigiinni pitsaasumik ineriartortitseqataanissaa sammivarput. Misissuinikkut anguniagaraarput atuisutta pisariaqartitaviisa qulaajarneqarnissaat. Atuisutta nioqqutitsinnut kissaataasa naammassiniartarnissaat pikkoriffiginerulerumavarput. Tamanna soorunami akinut tunngavoq, aammali pisariaqartitanut nalinginnaanerusunut tunngalluni. Iliuuseriniakkatsinnut atuisutta tapersersuilluarnissaat nioqqutittalu piviusunngortinneqarnissaannut peqataanissaat neriuutigaarput, atuisunut nalinginnaasunut qullersaq Per Svendsen oqarpoq.
Misissuineq aprilimi ingerlanneqassaaq. Apeqqutit internetikkut akinissaat minutsit 30-it missaannik sivisussuseqarput.
- Akisisulli ingerlaannartumik pinnattaassanut kusanartorsuarnut unammeqataanissamut ilaasussanngussapput, Tele-Post nalunaarpoq.