Tele-Post allatut ateqalersoq

Namminersorlutik Oqartussat ingerlatseqatigiiffiutaata suliffeqarfiup atia allanngortillugu kalaallisut ateqalissasoq aalajangersimavaa.

Suliffeqarfiup taaguutaa Tele-Post maanna oqaluttuaannanngorpoq. Nalunaarasuartaateqarnermik allakkerinermillu suliffeqarfik tamarmi maanna Tusass A/S-imik taaguuteqalerpoq.

Namminersorlutik Oqartussat ingerlatseqatigiiffiutaat tusagassiorfinnut nalunaaruteqarluni taamatut allappoq.

Grønlandsk navn

- Kiffartuussissutini Tusassini naleqartitaraarput pisariitsunnguunissaat, paasiuminartuunissaat atuisunullu atoruminartuunissaat. Maanna tamanna suliffeqarfimmut tamarmut atugaalernissaa kissaatigaarput, taamaattumillu taaguut taanna nutaaq ullutsinnullu naleqqunnerusoq atulissaaq, Tusassimut siulersuisuni siulittaasoq Stine Bosse tusagassiorfinnut nalunaruteqarnermi oqarpoq.

Pisortaaneq Kristian Reinert Davidsen suliffeqarfiup atiata allanngortinneqarnera pillugu oqarpoq:

- Tusass kalaallisut oqaaserineqarluartuuvoq, maani nunatsinni nunanilu allani taajuminartinneqarlunilu eqqaamajuminartinneqartoq. Taaguutaavoq tamatta nalunngisarput, maannalu nutaamik siammasinnerusumillu isumaqartinneqalersoq.

Taaguut arlaleriarluni allanngortinneqarsimasoq

Suliffeqarfiup taaguutiminik allanngortitsinera una siulliunngilaq. Tusass suliffeqarfiuvoq ukiut 150-it missaannik sorlaqartoq, Tusassilu taaguutit 20-ssaraat.

Taaguut ukiut 20-t matuma siorna siullermeerluni saqqummerpoq oqaluussinernut immertakkanut kiffartuussissummut taaguutigitinneqarluni. Ukiuni kingullerni sullitatta kiffartuussissutit allat aamma taamatut taaguutillit ilikkarpaat. Tusass mobil, Tusass internet, Tusass Suliffeqarfinnut, Nunani allani tusass aammalu Tusass meeqqanut. Suliffeqarfiup tamarmi maanna taaguutigilerpaa Tusass.

Powered by Labrador CMS