Tele Avannaani netsimut attaveqaatinik annertusaasoq

Avannaani internetseqarusuttunut ”aqqusineq” amippallaalersimavoq, taamaammat Tele-Posti Aaasiaat avannaata tungaani nalunaarasuartaateqarnikkut immikkut ”aqquserniorniarpoq”.

2017-imiit 2021-mut internetseqalersartut amerleriarujussuarnerat 2135%-mik internetternerulernermik kinguneqarsimavoq.

TELE-POST-ip siorna ukiumoortumik nalunaarsuiaani atuarneqarsinnaavoq, nunaqarfinni datanik atuineq 927%-imik annertuseriarsimasoq.

- Internettikkut datanik 2000%-it sinnerlugit atuinerulernerujussuup takutippaa sullitagut internettikkut periarfissanik atorluaanerulersimasut, Tele-Postimi teknikkeqarnermut pisortaaneq Jonas Hasselriis oqaluttuarpoq.

Internetsimik atuisut aqqutissanik amerlanerusunik pisariaqartitsisut

Taamaattumik nalunaarasuartaateqarnermut nutarterinissamullu aningaasaliinissaq pingaaruteqarpoq, pisortaaneq erseqqissaavoq.

Aasiaat tungaanut imaatigut kabeli aqqutigalugu attaveqaateqarpoq, atuisorpassuarnut iluaqutaasumik, Aasiaalli avannaani nalunaarasuartaateqarfik aqqutigalugu internetsertoqartarpoq, ”aqqusinerlu ataasiinnaq” atorlugu internetserniarneq ajornarsinnaasarpoq, taamaammallu tamanna allanngortinneqassaaq.

- Nalunaarasuartaateqarneq amerlasuunut paasiuminaassinnaavoq, tassa suliarput soorlu timmisartut umiarsuilluunniit angallannerattulli tigussaatiginngikkaluartoq qularutissaanngilaq internetsimik atuineq qaffakkiartuinnartoq, Jonas Hasselriis oqarpoq.

- Taamaattumik Kalaallit Nunaat tamaat Nunarsuarlu qaninnilerulersinniarlugit nalunaarasuartaateqarnermik nutarterinissanut aningaasaliinissaq pingaaruteqarluinnarpoq, taanna oqarpoq.

Tele-Postimit taamaammat pilersaarutigineqarpoq, ukiumoortumik sanaartornissamut atatillugu Aasiaat Ilulissallu akornanni link-iliissasoq.

Tamanna Avannaani datat ingerlaarnerisa ullumikkutut ataasiinnaanngitsumik marlunnilli aqqutissaqalernerannik kinguneqassaaq.