Teknologip nutaap immap assingi pitsaanerulersissinnaavai
Suliniutip nutaap umiarsuarnit paasissutissanik katersinerup nunatta imartaani immap assinginik pitsaassusaannik qulakkeerinneqataasinnaanerat aamma nutarterititsisinnaanerat misissorpaa.
Siunissaq ungasinnerusoq eqqarsaatigalugu immap assinginik nalunaarsuisarnermik pisariinnerulersitsisinnaasumik, Danmarkimi Geodatastyrelsen suliniummut ilannguppoq. Kalaallit Nunaannullu immap assiliornermut iluaqutaalluarsinnaavoq.
Geodatastyrelsenimi Søkortkontoretimi pisortaq, Niels Tvilling Larsen, Sermitsiaq.AG-mut taama oqaluttuarpoq.
Umiarsuarnit angalasunit imaanit paasissutissanik katersinissaq suliniummit siunertarineqarpoq, taakkulu pasissutissat siullermik immap assinginut pioreersunut pitsaassutsinik qulakkeerinnillunilu nutarterinermut atorneqassallutik. Teknologi iluatsittumik ineriartortinneqarpat, sumiiffinni assitaqanngitsuni immap assinginik pilersitseqataasinnaavoq.
Periuseq immap assinginik suliarinnittarnermut maanna periutsimut sanilliullugu siuariarfiusinnaavoq, aqutsisoqarfik maanna Illersornissaqarfiup umiarsuinit nalunaarsuinernik pisariaqartitsimmat, Niels Tvilling Larsen naliliivoq:
- Imartarujussuaq
- Kalaallit Nunaata eqqaani immap assinginik ajornartorsiuteqarneq imartarujussuuneranik pissuteqarpoq. Piffissami naleqquttumi Illersornissaqarfik paasissutissanik tamakkiisumik katersisinnaanngilaq.
- Periarfissaq alla tassaavoq, pitsaasuunissaat anguniarlugu umiarsuarnit amerlasuunit paasissutissanik katerseriarluta katiterisinnaavugut.
Ilisimatusarnikkut suliniutaasoq, Niels Tvilling Larsenip nangilluni oqaatigaa, taamaattumillu suliniut aqutsisoqarfiup maanna Kujataata kitaani immap assinginik suliaqarnernut arlalinnut, 2026-mi piareertussanut sunniuteqarnavianngitsoq.
Siullermik maanna uuttortaanerit assillu pioreersut pitsaassusaannik qulakkeerinnittoqassaaq, suliniullu qanittukkut angusaqarpoq, tassami qaammataasaq iluatsittumik aallartinneqarpoq.
- Paasissutissat pioreersut ilumoornersut takunissaat aallarniutigissavarput, Niels Tvilling Larsen oqarpoq.
Nunanit tamalaanit malinnaaffigineqartoq
Paasissutissat atorneqartussat qaammataasamit nutaamit katersorneqassapput, tassanilu aamma AIS-systemip, umiarsuit sumiinnerannik nalunaarsuisunik ineriartortitseqqiffiussaaq. Tamannalu allaffimmi pisortap oqarnera naapertorlugu aamma allamik iluaqutissiivoq:
- Sumiiffinni angallaffiunerpaasuni paasissutissanik amerlanerpaanik pissarsinissarput suliniutip matuma aamma iluaqutitaraa, Niels Tvilling Larsen oqarpoq.
Suliniut EU-mit tapiiffigineqartoq, aamma qanoq inerneqarnissaanik nunanit tamalaanit maluginiarneqartoq, taassuma aamma oqaluttuaraa:
- Immap assinginik naammaginartumik peqannginnera Kalaallit Nunaanni kisimi ajornartorsiutaanngilaq. Nunarsuarmi sumiiffinni amerlasuuni ajornartorsiutaavoq, taamaattumillu suliniut nunanit tamalaanit maluginiarneqarpoq.