Taxartumit aallarunneqaleraluartut?

- Ipad mini annassutigaarput.

Oqaluttuartoq tassaavoq meeqqat inuusuttullu suliniaqatigiiffianni Sorlammi siulersuini ilaasortaq Hans-Kristian Petrussen aallaruteriarneqarnermi misigisaqarsimasoq.

Misigisaat tallimanngormat Canadami illoqarfissuarmi Montrealimi pivoq Nunavummi illoqarfimmut Cambridge Bayimut angalatillutik tassunga aqqusaarnerminni. Nunatsinneersut arlaliullutik taxa angisooq pissarsiarisimavaat sunaaffa peqquserlunnissamik siunertalik.

Naveerpai
- Ornitassatta aqqutaa Ipad minimi misissorpara taxamik pissarsinissarput sioqqullugu. Kisianni taava allarluinnarmut sannguteriasaarpaatigut, Hans-Kristian Petrussen Montrealimiit oqaluttuarpoq.

Kalaallit ilaasut aallaqqaammut eqqissisimapput ingerlatitsisorlu oqaluullugu kukkulluni ingerlaartoq. Taannalu eqqissilluni akivoq ornitassaat nalunngilluinnarlugu.

- Kisianni kukkusumik siumut ingerlaannarpoq naak oqaluttuukkaluaritsinni sumunnarnerluta. Naveerlutali akiinnarpaatigut ornitatsinnullu qanillinerarluta, Hans-Kristian Petrussen oqaluttuarpoq.

Qimaapput
Taamaasimmat aalajangerput periarfissaq siullerpaaq atorlugu taxamiit niuniarlutik.

- Aqquserngup naapiffiani biilit arlallit uneqatigaavut. Ilakka oqaluuppakka piaarnerpaamik niussasugut. Ilarput akiliileraluartoq oqarfigaarput akiliinani piaarnerpaamik qimaaqullugu, Hans-Kristian Petrussen oqaluttuarpoq.

Taxa qimatserasuarpaat allamik taxassarsiorlutik. Allamulli ikitinnatik ornitassamik adressea nalunnginneraa qulakkeeqqaarpaat.

- Montrealimi najugaqarfigisarput naggueqaterput oqaluttuarpoq naggueqativut taamatut aamma aallarutsittarsimasut, Hans-Kristian Petrussen oqaluttuarpoq.

Pisimasoq politiinut nalunaarutigineqanngilaq Sorlamiillu angalasut Canadap issittortaanut paasisassarsiortut ataasinngornermi Nunavummi Cambridge Bayimut ingerlaqqipput.

Sorlammeersut angalanerat uani malinnaavigisinnaavat