Aleqap atornerluinera
Tatiginninnginnermik taasititsisoqarnissaa sioqqullugu K. Jeremiassen isertortoq
Siumumit Kristian Jeremiassen tatiginninnginnermik taasititsisoqarnerani Aleqa Hammondip Naalakkersuisut siulittaasuuneranut uppisitsisinnaavoq
- Illuatungiliuttut qanoq siunnersuuteqassanersut ilisimanngilara, Kristian Jeremiasen, Siumut, oqarpoq.
Partii Naleqqap siulittaasua Hans Enoksenip Naalakkersuisut siulittaasuannut Aleqa Hammondimut Inatsisartuni tatiginninnginnermik taasititsinissani Sermitsiaq.AG-mut ataasinngornermi oqaatigaa. Aleqa Hammondip nunatta karsiata aningaasaataanit 106.363,27 koruuninik atorluisimanera ilungersunartut isigaa Enoksen oqarpoq.
Ikinngutaa Kristian Jeremiassen, Kukkunersiuinermik ataatsimiititaliami siulittaasuusoq, maannamut oqaatigiumanngikkallarpaa qanoq taasiniarnerluni.
- Inatsisartut aningaasanut missingersuutaat saqqummiunnissaa maannamut saqqummiutissallugu kisimi suliassatut isigigallarpara oktobarip 20-ata missaani.
Aningaasanik atornerluisoqarsimanera annertungaarmat ataatsimiititaliami ilaasortaasut pingaartissimavaat tamanna Inatsisartunut ilaasortanut nalunaarutigissallugu. Tamanna septembarip 26-ani tallimanngornermi pivoq. Tallimanngornerup unnukkuani aamma tamanna tusagassiutitigut tusarliunneqarpoq.