Tatiginninnginneq pissutigalugu immikkut ittumik ataatsimeersuartoqarsinnaavoq
Partii Siumup immikkoortortaqarfii amerlanerussuteqartut Siumumi ilaasortat nuimasut arfineq-marluusut siulittaasuminnik tatiginninnginnerat isumaqatigissappassuk, taava partii immikkut ittumik ataatsimeersuarataannaavoq.
Kim Kielsenip Siumumi siulittaasutut siunissaa Kalaallit Nunaanni partiip immikkoortortaqarfiini 60-iusuni aalajangerneqarsinnaavoq.
Siumut pingaarnertut allaffeqarfiani Nuummiittumi allakkiamik Kalaallit Nunaanni immikkoortortanut 60-iusunut akunnerni makkunani nassiussuisoqarpoq.
Siumup anguniarpaa allakkiaq immikkoortortanut tamanut e-mailikkut ullumi nassiunneqassasoq.
Tatiginninnginneq Kimimik uppisitsisinnaavoq
Siumumi siulittaasup tulliata, Karl-Kristian Krusep Sermitsiaq.AG-mut nassuiaatigaa immikkoortortaqarfiit amerlanerussuteqartut Inatsisartunut ilaasortat arfinillit aamma aatsitassanut suliffeqarnermullu naalakkersuisoq, Erik Jensen isumaqatigissappagit, taava kingunissat ilagisinnaagaat immikkut ittumik ataatsimeersuarneq.
Partiimmi malittarisassai malillugit immikkoortortaqarfiini amerlanerussuteqartut tatiginninngippata, taava immikkut ittumik ataatsimeersuartoqassaaq.
- Immikkoortortaqarfiit ataatsimik akissuteqassapput. Ilaasortat arfineq-marluusut siulittaasumik tatiginnikkunnaarlutik nalunaaruteqarnerat tapersersornerlugu, imaluunniit ulluinnarni aqutsisut aamma siulersuisuunerit siulittaasumik suli tatiginninnerat tapersersornerlugu, Siumumi siulittaasup tullia, Karl-Kristian Kruse nassuiaavoq.
Siumumi ulluinnarni aqutsisut aamma siulersuisuunerit ippassaq ataatsimiinnermi nalunaaruteqarput partiip Siumup siulittaasua Kim Kielsen suli tatigilluinnarlugu, taamatullu ataatsimeersuarnissap aappaagu ingerlanneqartussap tungaanut siulittaasuuginnarnissaa kissaatigalugu.
Immikkoortortaqarfiit 60-iusut apeqqummut akinissaminnut ullunik qulinik piffissalerneqarput.