Tatiginnikkunnaarneq Demokraatit pinngitsoortikkaat
Partii Naleqqap Inuussutissarsiornermut Nukissiuuteqarnermullu naalakkersuisumik, Aqqalu Jerimiassenimik tatiginnikkunnaarnerat Demokraatit siulittaasuata Niels Thomsenip ilalernianngilaa. Naalakkersuisut taamaasillutik maannatut ingerlaqqissapput.
Partii Naleraq tatiginnikkunnaarnermini IA-mit ilalerneqarpoq, tamannali Aqqalu Jerimiassenip naalakkersuisuujunnaarnissaanut naammanngilaq.
Aqqalu Jerimiassenip nassuiaataa, tassa isumaqatiginninniartoqarsimanngitsoq, taamaattorli Kinami suliffeqarfinnik sapaatip akunnerata siuliani nittarsaassisoqarsimanera, Niels Thomsenip naammagisimaarpaa.
- Kalaallit Nunaat nunani allani nittarsaanneqartarnera tapersiinnarsinnaavara, Niels Thomsen erseqqissaavoq, piginnaatitsisoqarsimannginneralu itigartitsissutigalugu.
- Isumaqatiginninniartoqalersimagaluarpat ajornartorsiuteqassagaluarpugut, Niels Thomsen oqarpoq.
Tusagassiutinut nalunaarut
Inuussutissarsiornermut naalakkersuisoqarfiup una ippassaq nassiuppaa:
“Suliffeqarfinnik nittarsaassineq iluatsillugu Aqqalu Jerimiassen nalunaaruteqarpoq nunatta kitaani sumiiffiit tallimat imermik maqitsiviusinnaasut novembarip naalernerani suliariumannittussarsiuussinerit annertuut aallartissinnaalissasut.”
Ergup sermillu tunisassiarineqarsinnaalernissaanut inatsisissatut siunnersuutip oqaluuserineqarnerani Partii Naleqqap tatiginnikkunnaarnini saqqummiuppaa.
Maannalu apeqqutaalerpoq Aqqalu Jerimiassen inatsisissatut siunnersuutip torersumik Inatsisartuni aalajangiiffigineqarnissaa qanoq ililluni angusinnaassaneraa.
Niels Thomsenimut tamanna ajornartorsiutaanngilaq, Aqqalu Jerimiassenilu suli tatigaa.
Aqqalu Jerimiassen nassuiaammini utoqqatserpoq, apeqqarissaarfigineqarnermini ilaatigut kukkusumik akissuteqarsimagami.
- Aqqalu Jerimiassen tamanna pillugu utoqqatserpoq, tamanna ilinniarfigisinnaavarput, Niels Thomsen naqissusiivoq.
Pele Broberg:
– Inatsisit suli inissinneqanngikkaluartut, nioqqutissap avammut nittarsaannissaa illit ajorinngiliuk? Pele Broberg Niels Thomsenimut apeqquteqarpoq.
-Inatsisit malinnagit isumaqatiginninniartoqarsimanersoq takusinnaanngilarput, Niels Thomsen naqissusiivoq.
Aleqa Hammondip paasisinnaanngilaa sooq tatiginninnginnermik taasititsiniartoqarnersoq, illuatungaanili tatiginninnginnermik taasititsiniarneq toqqartinnagu apeqqutit qulaajaassutaasinnaasut atorneqarnerusinnaasut kaammattuuteqarluni.