Aleqap atornerluinera
Tatiginartumik Siumumi siulittaasoqassasoq Doris piumasaqarpoq: Aleqa, tunuarit
Inatsisartuni Folketingimilu ilaasortaq Siumumeersoq, Doris Jakobsen, partiip immikkut ittumik ataatsimeersuarnissaa piumasaraa
Aleqa Hammondip nunatta karsianit 106.363,27 koruuninik namminerminut ilaquttaminullu atuisimanera pissutigalugu Siumumit Doris Jakobsen, partiimi immikkut ataatsimeersuartoqarnissaa piumasaraa.
- Innuttaasut Aleqa Hammondimut tatiginnikkunnaarnerat naalagiaqatigiittoqareernerani ippassaq marlunngornermi takuarput. Taamaattumik Siumumi immikkut ataatsimeersuartoqarnissaa kisimi aqqutissaalerpoq. Innuttaasut Siumumut tatiginneqqilissappata taamaasiortoqartariaqarpoq, Doris Jakobsen Sermitsiaq.AG-mut oqarpoq.
Inatsisartunut ilaasortat maannakkut issiasut inuit tatiginnilernavianngitsut Doris Jakobsen oqarpoq.
- Siulittaasutta tullii, Jørgen Wæver Johansen aamma Mikael Petersen Inatsisartuni ilaasortaanngillat. Siumumi pissusiuvoq siulittaasutta nunatsinnut aqutsisuunissaanut innersuunneqartussaq. Taamaattumik Siumut immikkut ittumik ataatsimeersuartariaqarpoq, tassanilu nutaamik siulittaasortaartariaqarpugut, Doris Jakobsen oqarpoq.