Skip to main content

Tassaarsuarmi eqqugaasunut tunissutit nutaat

Kommune Kujalliup Uummannap nunaqarfiinut 17. juni eqqugaasimasunut tapiissuteqarumalluni inissialiornissamut pilersaarutini kinguartippai

- Aningaasaqarnermut ataatsimiititaliap, Uummannap eqqaani nunaqarfimmiunut eqqugaasunut ersoqataalluni, toqqarpaa kommunip nunaqarfinni inissialiornermut pilersaarutit aappaagumut kinguartissallugit, taamaaliornikkullu 4,5 mio.koruunit illunut assigiinngitsunut atugassiassanut aammalu illunut kiffartuussinermut atugassianut ukioq manna atugassaagaluit Uummannap nunaqarfittaamiunut ajunaarnersuarmi eqqugaasunut atorneqarsinnaanngorput.

Kommune Kujallermi borgmesteri Kiista P. Isaksen (S) tusagassiuutinut nalunaarummi oqarpoq.

Taamaalilluni Kommune Kujalleq suliniutinut ukiunut arlalinnut siammarsimasunut aningaasaliissutit ukiumik ataatsimik kinguartippai, taamaaliornermigullu eqqugaasut angerlarsimaffeqaqqilernissaannut tapersersuilluni.

- Erseqqissaatigineqassaarlu kommunep illunik assigiinngitsunik atugassianut aammalu illunut kiffartuussivinnut pilersaarutini ukioq manna ingerlatiinnassavai, sanaartorneqarnissaali 2018-mi ukiunilu tulliuttuni aatsaat ingerlanneqalissapput, Kommune Kujalleq paasissutissiivoq.

Danskit tunissutaat

Danskit naalakkersuisuisa Kalaallit Nunaanut inissialiornissamut eqqugaasimasulli nutaamik aallartinnissaannut 30 millionit koruuninik tapiissuteqarumallutik Folketingimut qinnutigisimagaat, ataasinngornermi tamanut nalunaarutigineqarpoq.

Naalakkersuisut Siulittaasuat aamma Qaasuitsup Kommuniani borgmesteri Ole Dorph isumaqatigiillutik oqaaseqarput:

Danskit naalakkersuisuisa 30 mio. koruuninik tapiissuteqarniarnerat, Namminersorlutik Oqartussat aamma Kommunip pinngortitami ajunaarnersuup kingorna innuttaasunut qimagutsinneqarsimasunut nutaamik aallartinnissaannik ikiuiniarnissaannut isumalerujussuuppuut.

Ajunaarnersuarmit eqqugaasimasut sumiiffimmi nutaami nutaamik aallartinniarnerat oqimaallunilu akisoorujussuuvoq. Ineqarneq, inuussutissarsiornikkut periarfissat, pequtit, atisat ilaalu ilanngullugit ilaqutariit inuuniarnermikkut toqqissisimanissaanut pingaarutilerujussuupput.

Taamaammat danskit naalakkersuisuisa tapiissutaat innuttaasunut eqqugaasunut ilaqutariinnulli ikiuiniarnissamut pingaaruteqarput. Taamaammaat neriuutigaarput danskit naalakkersuisuisa suliniutaat Folketingimit taperserneqarumaartoq.

Naalakkersuisut sapaatip-akunnerata siuliani tassaarsuaqarnerup kingorna inisseeqqinnissamut aningaasat katillugit 70 mio. koruunit piareersimatinneqartut. Danskillu naalakkersuisuisa tapiissutaat ilanngukkaanni aningaasat katillugit 100 mio. koruunit missaanniittut ilaqutariit eqqugaasimasut inissinneqaqqinnissaannut atorneqassapput. Tamannalu ilaqutariit eqqugaasimasut ullumikkumut naleqquttumik nutaamik ineqalernissaannik malitseqassaaq aammalu sukkanerpaamik inissialiortoqassalluni.

Taassuma saniatigut danskit naalakkersuisuisa GEUS-ip Kalaallit Nunaani nunap sisoornissaanut aarlerinassutsimut misissuinermut atugassaanik 10 mio. koruuninik immikkoortitsisimavoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER