Tasiilaq: Umiarsuaq takornariartaat nioqqutissanik nutaanik usisoq

Umiarsuaq takornariartaat Tasiilamut ukioq manna tikittoq siulleq sapaammi 7. maj tikippoq.

Umiarsuaq ”Le Commandant Charcot” Ponantimeersoq takornarianik ilaasoqaannanngilaq. Aammali nioqqutissanik nutaanik usivoq, Tasiilami niuertarfinni pisiarineqarsinnaasunik.

- Umiarsuaq Issittumi takornariartaat sikusiullammassuaq "Le Commandant Charcot” nioqqutissanut nutaanut palletsinik arlalinnik inissaqartitsisinnaalluni pajuppoq taamaalillunilu aamma inuiaqatigiinni kalaallini iluaqusersueqataalluni, Royal Arctic Line suleqatigiinneq pillugu Facebookimini allappoq.

Suleqatigiinnissamut isumassarsisup, Justus Hansenip, suliniut iluatsimmat nuannaarutigaa.

- Umiarsuaq siorna piffissap taama isinerani tikippoq, tassa RAL-ip assartuilernissamut suli periarfissaqalinnginnerani. Suleqatigiinneq umiarsuaatileqatigiiffiup, KNI-p RAL-illu akornanni iluatsippoq. Illoqarfiup pilersorneqarnera taama oqilisaaqataaffigisinnaagakku nuannaarpunga tulluusimaarlungalu, Justus Hansen Sermitsiaq.AG-mut oqarpoq.

Taassuma suliaqartut upernaakkut 2022-mi attavigai, umiarsuaq takornariartaammi nioqqutissat nutaat assartorneqarsinnaanersut paasiniarlugu. RAL Tasiilamut maajip naaneraniit assartuilersinnaanini maanna naatsorsuutigaa.

Nioqqutissat nungoqqereersut

Takornariat tikissammata Tasiilami innuttaasut sapaammi nuannaarput. Umiarsuaq tikittoq siulleq isumaqarpoq upernartoq, aningaasarsiortoqarsinnaasoq illoqarfimmilu pisoqarnerusinnaasoq.

- Nuannaarnerlu anneruliinnarpoq nioqqutissat nutaat palletsit quliusut illoqarfimmut assartorneqarmata. Innuttaasut pisiniarfimmut tunuleriaapput, nioqqutissanik nutaanik pisiniarlutik. Nioqqutissat ippassaq assartorneqartut maanna nungoreerput. Iluatsilluarpoq, Justus Hansen oqarpoq.

Royal Arctic Line ilisimatitsivoq innuttaasut suleqataasimasut, KNI-llu nioqqutissanik qinunissaq isumagisimagaa. RAL-ip ilanngullugu ilisimatitsissutigaa Ittoqqortoormiinut umiarsuaq takornariartaat atorlugu aamma pajuttoqalersoq, tikinnissaq sapaatit akunneri marluk missaat qaangiuppata naatsorsuutigineqarluni.

- Neriuppunga taama assartuisinnaaneq maajip qiteqqunnerani iluatseqqissinnaassagipput. Pisariaqartitsisoqarpormi. Takornarialerisut nioqqutissanillu pilersuisussat akornanni suleqatigiinneq iluatsilluarpoq, Justus Hansen oqarpoq.