Skip to main content

Tasiilaq: Ullormi ataatsimi meeqqat pillugit suliassat nutaat aqqanillit

Isumaginnittoqarfimmi pisortap Martha Lund Olsenip neriorsuutigaa, Tasiilami isumaginninnikkut misissuisarnerit aaqqiiffiniarlugit sapinngisamik suna tamaat atorlugu sulisoqassasoq

Kommuneqarfik Sermersooq Tasiilami meeqqat pillugit peqqussut, Isumaginninnermut Naalakkersuisoqarfimmit aggustusip 15-iani tunniunneqartoq, naammassiniarlugu annertuumik suliaqarpoq. meeqqalli ikiorneqarnissamik pisariaqartitsisut amerlasoorujussuupput.

Kommunip peqqussummik naammassinninniarluni uku suliarai:

Allaffissornermi tunngaviit, ajornannginnerusumik sunniuteqarnersumillu sullissinissamik qulakkeerinnittussat misissorneqarnerat.

Ingerlatsivimmi malitseqartitsisartut Tasiilamiinnaq isumaginninnikkut misissuisussat suleriasissaasa allanngortinneqarnissaat.

Nuummi Tasiilamilu sullissisartut akornanni, aamma Tasiilami sullissisartut akornanni  suliassaannik erseqqinnerusumik agguataarisalernissaq.

Isumaginninnermi Aqutsisoqarfimmi sulisumik attartorneq, Tasiilap atuarfiani inunnik isumaginnittumik attartorneq aqqutigalugit allatut sulisussarsiorsinnaanermi periarfissat aamma Aalborg Kommunimik paarlaasseqagiittarnissamik isumaqatigiissut aqqutigalugu sullissisussanik marlunnik attartorsinnaaneq.

Nuummi sullissinermik misilittagallit ingerlaavartumik Tasiilamukartinneqartarput, najukkami sullissisut paasissutissanik katersisarneranni ikiuuttartussatut.

Tasiilami meeqqanut ilaqutariinnullu sullissivimmi pisortassamik atorfinitsitsinikkut pisortat pisussaaffiinik agguataarineq, atorfinitsinneqartoq najukkami aalajangiisassaaq, kiisalu Tasiilami ataqatigiissaarisussamik, isumaginninnikkut misissuisoqarnerani Nuup Tasiilallu akornanni suleqatigiinnermik ataqatigiissarisartussamik toqqaasassaaq.

Maajip juunillu qaammataanni nalunaaqqaarani nakkutilliiartorsimanerup takutippaa, Tasiilami meeqqanut tunngatillugit sulianit 201-iusunit 189-it inatsisitigut pisussaaffigalugit qaammatit marluk iluanni isumaginninnikkut misissuiffigineqarsimanngitsut. Meeqqat eqqortumik ikiorserneqarnissaasa qulakkeerneqarnissaannut misissuisarnerit pingaaruteqarput.

Peqqussutitigut kommuni periarfissinneqarpoq aggustusip 15-aniit aallartittumik qaammatit sisamat ingerlaneranni suliat taakkut 189-it isumaginninnikkut misissorneqarnissaannut. Suliassat pisoqaanerpaat siulliullugit aallartinneqassapput.

- Sainngisarput tamaat taakku naammassiniassavagut, naammassineqarnissaalli 100 procentimik neriorsuutigisinnaanngilara, apeqqutaajuaannarpormi naammattunik sulisussaqarnersugut, Meeqqanut Ilaqutariinnullu sullissivimmi pisortaq Martha Lund Olsen oqarpoq.

- Piffissaliussalli nallinnginnerani suliassanik tamanik aallartitsinissarput tamaviaarluta sulissutigaarput.

Meerarpassuit ikiorserneqarnissamik pisariaqartitsisut

Peqqussummi aamma allassimavoq, qaammatit sisamat qaangiukkaangata,  suliassanut nutaanut tunngatillugu qaammatinik marlunnik piffissaqartitaasarneq malinneqartassasoq.

- Matumani aamma piumasaqaat malinniarlugu tamaviaarluta sulivugut. Tamatumanili sulisussaqarnerput kisimi apeqqutaanngilaq, aammali suliassat qanoq amerliartortiginerat apeqqutaavoq.

- Aasap ingerlanerani ullormi ataasiinnarmi meeqqanut tunngatillugu suliassat aqqanillit nutaat pissarsiaraavut. Tassa Tasiilami meerarpassuaqarpoq ikiorserneqarnissamik pisariaqartitsisunik, Martha Lund Olsen naqissusiivoq.

Suliat tigussaasut ilagivaat, Tasiilami meeqqanut ilaqutariinnullu sullissivimmi pisortassamik atorfinitsitsisimaneq, taamaalilluni najukkami aalajangiisoqarsinnaanngorpoq.

Ajornartorsiutaasulli annerpaat ilagivaat, Tasiilami atorfiit inuttaqanngitsut ataavartumik inuttalerneqarsinnaannginnerat.

Ajornartorsiut tamanna aaqqiiffiginiarlugu Nuummi sullissinermik misilitttagallit Tasiilamukartinneqartarput, suliassarpassuit aaqqiiffiginiarlugit najukkami ikiuuttussat. Aamma Aalborg Kommunemik paarlaasseqatigiittarnissamik isumaqatigiissut tunngavigalugu Aalborgimi sullissisut marluk Tasiilamukartinneqarsimapput. Taakku isumaginninnermi nassuiaasiortarnermik najukkami sulisunik ilaatigut ilinniartitsissapput.

- Maannakorpiaq sullissisoq ataaseq Tasiilami inunngorsimasoq Danmarkimilu najugartoq ikiuuttarpoq. Tamanna pitsaalluinnartuuvoq, Martha Lund Olsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER