Tasiilaq: Qamuteralattoq periarfeerunneqartoq

Angut 47-nik ukiulik Tasiilameersoq arfininngormalli tammaaneqalertoq, Tasiilami politiinit ujaarineqarpoq. Ataasinngornermi silarlunnera pissutigalugu angut ujaarineqarsinnaanngikkallarpoq

Angut 47-nik ukiulik Tasiilameersoq, qamuteralalluni Tiniteqilaamukarsimasoq, arfininngormalli periarfeerunneqarpoq.

Tasiilami Politiit Sermitsiaq.AG-mut paasissutissiaraat, angutip 47-nik ukiullip ilaqutaasa sapaatiummat ujaarineqarnissaanik Tasiilami politiinut nalunaarutiginnissimasut.

- Sapaatiummat qamuteralaat atorlugit angut ujaarivarput, nittaangaatsiarnerali pissutigalugu takuneqarfia kingulleq tikinnanguli ujaasineq taamaatittariaqarsimavarput, Mathæus Larsen Tasiilami politiininngaanneersoq oqarpoq.

Illoqarfiup nunaqarfiullu aqqutaata qeqqani kingullermik takuneqartoq.

Mathæus Larsen naapertorlugu Mikael Mikaelsen Tasiilap Tiniteqilaallu aqqutaata qeqqata missaani, illuaqqat ungasinngisaanni, kingullermik takuneqarsimavoq.

- Tasiilap Tiniteqilaallu aqqutaata qeqqata missaani pingasunik illuaraqarpoq, Mikael Mikaelsenilu taakkununnga oqquiartorsimanissaa neriuutigaarput. Sapaatiummalli silarlunnera pissutigalugu illuaqqat taakku angusinnaasimanngilagut, Mathæus Larsen oqarpoq.

Silaqqissippat Tasiilami politiit angummik ujaasinertik nangissavaat.

Powered by Labrador CMS