Tasiilaq: Meeqqat pillugit suliani sulisut ikippallaartut
Suliissisunik sulisussarsinissaq aamma sulisoqaannarniarneq Tasiilami ataavartumik ajornartorsiutaavoq
Kommuneqarfik Sermersuumi isumaginnittoqarfimmi pisortap, Martha Lund Olsenip, isumaginninnermi siunnersortini Tasiilami atorfinnut pissarsiniarneq ataavartumik ajornartorsiutaasoq nassuerutigaa.
Sulisut ikippallaarneri pissutigalugit Tasiilami meeqqat pillugit suliat uteqattaartumik ingerlanerlunnerarlugit isornartorsiorneqartarput.
- Sullissinertaanut sulisut amerlanerunissaat suli amigaatigaara. Tassanngaanniimmi meeqamut suliniuteqarneq aallartittarpoq, siornatigut ilinniartitsisoq siunnersortaasimasoq Rikke Blegvad Sermitsiaq.AG-mut taama oqarnikuuvoq.
Qinnuteqartoqanngitsoq
Kisianni ajornartorsiummut ajornaatsumik aaqqiissutissaqanngilaq, Martha Lund Olsen oqarpoq.
- Ukiup matuma aallartinnerani atorfiit allagartaliukkatsigit qinnuteqartoqanngilaq, taanna oqarpoq.
Utaqqiisaasumik aaqqiissutitut isumaginninnikkut siunnersortit marluk pingaarnertut marluinnik oqaaseqartut Danmarkimeersut illoqarfimmut aallartinneqarsimapput. Maanna Isumaginninnermut Aqutsisoqarfik Namminersorlutik Oqartussat ataanniittoq sulisunik marlunnik ikiorsiisimavoq.
- Tulliani isumaginninnermi siunnersortit najugaq qimannagu ilinniarsimasut imaluunniit siunnersortinut ikiortitut ilinniagallit qinnuteqaateqassasut neriuutigaarput, Martha Lund Olsen oqarpoq.
Siunnersortinut ikiortit qaammatip aallartinnerani ilinniakkaminnik naammassinnittut ilaat atorfinitsinneqaqqammerpoq.
- Kisianni ataatsimut isigalugu sulisussarsiornermi aamma sulisut sulisoriinnarnissaannik ajornartorsiuteqarpugut, isumaginninnermut pisortaq nassuerpoq.
Tasiilami kommunimi sulisunut tamanut sumiiffimmi pisortamik atorfinitsitsisoqaqqammerpoq. Aqutsisut nutaat aamma suliffeqarfiup isumaginninnermi siunnersortinut pilerinarnerulersissagaat, Martha Lund Olsenip neriuutigaa.
- Aningaasanik immikkoortitsinikuuvugut aamma piumassuseqarpugut, kisianni qinnuteqartoqartariaqarpugut.
Katsorsaanissamut neqeroorutit naammattut
Sullissinermut kisimi ajornartorsiortoqanngitsoq, Rikke Blegvad isumaqarpoq. Angalaqatigiit psykoterapeutit marluk Tasiilami meeqqat ikiorneqartariaqartut tamaasa katsorsarsinnaanngikkaat, taanna isumaqarpoq.
- Maanna naammannersoq naammannersorluunniit oqaaseqartoqarsinnaanngitsoq isumaqarpunga. Meeqqat atornerlugaasimasut taamatut katsorsarneqarneranni peqqissaaqqissaartoqartussaavoq. Tamatuma kingorna tamanna naammannersoq paasissavarput, Martha Lund Olsen oqarpoq.
Meeqqanut sumiginnagaasunut tunngatillugu neqeroorutinut allanut innersuussivoq, ilaqutariit sullissiveqarnerarlugu.
Tassani sulisut meeqqanut angalaqatigiinnit kiisalu inersimasunut atornerlugaasimasunut kingunerlutsitsisunut angalaqatigiinnit psykologinit sulinerminni taperserneqartarput.
Isumaginninnikkut iliuuseqarnerup kisiami illoqarfimmi isumaginninnikkut ajornartorsiutit iluarsisinnaanngikkai, Martha Lund Olsen isumaqarpoq. Inuit suliffeqarnissaat sulissutigineqartariaqarpoq.
- Makissutissaqartilluni ileqqunit pitsaanngitsunit ingerlaqqinniarneq ajornannginnerusartoq nakimananga isumaqarpunga, taanna oqarpoq.