Tasiilaq: Innuttaasunik peqataatitsineq allannguisitsissaaq

Inuiaqattigiit najukkamiittut aaqqiiniarnrmut peqataatinneqarpata ,Tasiilami ajornartorsiutit aatsaat iluarsineqarsinnaapput. Isumaginninnermut naalakkersuisup, Martha Abelsenip (S) tamanna qularutiginngilaa.

Taamaattumik Kalaallit Nunaanni Politiinit aallartitaq ilaatigut peqatigalugu Tasiilamut ataatsimiititsiartorpoq.

- Innuttaasut maanna peqataatinneqarnissaat pingaartippara, taanna Sermitsiaq.AG-mut oqarpoq.

Inuusuttut ilaasa oqaluuserisassat aalajangerpaat, ajornartorsiutillu qanoq isiginerlugit oqaluttuaralugit.

- Sammisat Tasiilami atuarfimmi atuartunit annernit oqaasertalersorneqarput, inersimasut suut oqaluuserissaneraat kissaatigalugu ukkatarinnitsitserusupput.

Ittoqqoortoormiinit isumassarsiaq

Suliniut iluatsissappat, pingaaruteqarluinnarpoq cafémi ataasiaannarluni ataatsimiittoqannginnssaa, kisianni ataatsimiinneq ataavartumik suliniuteqarnermik kinguneqarnissaa pingaaruteqarpoq. Martha Abelsenip matumani Ittoqqortoormiini suliniutigineqarsimasumut isumassaarsiorpoq, tassani najugaqartut nukissallit ataatsimiititaliamut katersorneqarput, taakku ajornartorsiutit aaqqinneqarnissaannut akisussaatinneqarlutik.

- Taakku suliamik ingerlatitseqqinnissaat tassani isumaqatigiissutigineqarpoq, aamma inuit aallareerpata. Taakkuuppummi tassaniillutik najugaqartussat.

Periutsimik nutarsakkamik taamaattumik Tasiilami pilersitsinissamik takorluugaqarpoq.

- Najukkami suliaqartunik Tasiilami innuttaasut kivitserusuttut – nukissaqartut nukissakinnerusullu - tamarmik peqataatillugit ukkatarisitsiniarpunga.

Nukissat ujartorneqarnerat

Ataatsimiinneq sivisuumik suliaqarnerup ilaatut pissaaq, tassani isumaginninnermut aqutsisoqarfik, politiit aamma Kommuneqarfik Sermersooq inuiaqatigiit aallartisarniarlugit suliaqarput. Aammattaaq illoqarfimmi inuit nukissaqartut aaqqeeqataasinnaasut ujartorneqarput.

Ataatsimiinnerup kingorna najugaqartut nukissallit aamma pisariaqartitaminnik taperserneqarnissaat qulakkeerneqassaaq.

- Tikeraareernerma kinguninngua ataatsimiititsissaanga, kikkut qanoq iliuuseqarnissaannik isumaqatigiissuteqassalluta, taamaalilluta Tasiilami sulinerup ingerlaannarnissaa aamma innuttaasut peqataatinneqarnerisa ingerlaannarnissaat qulakkiissagatsigu.

Najugaqartut peqataatinneqarnerat allannguinermut aalajangiisuulluinnarsinnaasoq, Martha Abelsenip qularutiginngilluinnarpaa. Tassami suliniuterpassuugaluartut, piviusulersaarutip annertuumik oqaluuserineqartup takutippaa, kinguaassiutitigut atornerluinerit aamma imminut toquttarnerit unitsinneqarnissaat iluatsinngilaq.

- Qularutiginngilara taamatut iliuuseqarneq aqqutissaasoq.