Tasiilaq: Erngup nukinganik nukissiorfiup allilerneqarnera minnerpaamik 40 mio. koruuninik akeqassasoq

Naalakkersuisut Tasiilami erngup nukinganik nukissiorfiup allilerneqarsinnaanera pillugu Nukissiorfinnit oqaloqateqarsimapput.

Tamanna Inatsisartuni ilaasortap Lars Poulsenip (S) paragraf 37 naapertorlugu apeqqutaanut Nukissiuuteqarnermut Naalakkersuisup Kalistat Lundip akissutaani atuarneqarsinnaavoq.

- Nukissiorfiit paasissutissiipput, maannakkut nukissiuummik tunniussinnaasaminninngaanniit annertunerusumik, erngup nukinga atorlugu, tunniussagarsinnaanatik. Taamaattoq erngup nukinga atorlugu nukissiornerup annertusineqarsinnaanera periarfissaasoq. Naalakkersuisut september 2021-imiilli Nukissiorfiit attaveqatigisarpaat, Tasiilami erngup nukinga atorlugu nukissiorsinnaanerup annertusineqarsinnaanera aningaasalersuinertaanullu tunngasut pillugit, Kalistat Lund Lars Poulsenimut akissuteqarluni ilisimatitsivoq.

Alliliisoqassappat, tamanna minnerpaamik 40 millioner koruuninik naleqassasoq missingiisoqarsimavoq, aningaasat pineqartut immikkut ittumik nukissiorfiliornermut kiisalu illogarfimmut pilersuinermi attavilersuinermut atorneqassallutik.

Naalakkersuisoq akissutissaminik suliaqarnermini Nukissiorfinnit paasissutissanik pissarsisimavoq. Nukissiorfiit tassunga atatillugu ilisimatitsipput, Tasiilami nukissiuteqarnikkut pilersuiffiit sanaartukkallu annerusumik illuinnaanerat pillugu innaallagissiornikkut attaveqaatit sakkortusarneqarnissaannut kiisalu innaallagissiornikkut ikkuffinnik pisiortornissaq aamma avaqqunnegarsinnaassanngitsut.

-Erngup nukinganik innaallagissiorfiup annertusisarnissaanut immikkut nukissiorfimmik Tatsip 160-p aamma Tatsip 100 akornanni pilersitsinissaq periarfissaavog. Tamanna erngup nukinganik innaallagissiornerup iluani innaallagissiornerup minnerpaamik 50%-mik annertusineqarnissaanik isumagartoq, ilisimatitsissutigineqarpoq.

Maanna nukissiorfiusoq tamakkiisumik pilersuisinnaasoq

Lars Poulsenip paragraf 37 naapertorlugu Nukissiuuteqarnermut Naalakkersuisumut apeqquteqarnermini paaserusussimavaa, Tasiilami suliffeqarfiit amerlanerulissagaluarpata, illoqarfimmi erngup nukinganik nukissiorfik annertunerusumik pilersuisinnaanersoq.

Kalistat Lundip tassunga atatillugu ilisimatitsissutigaa, erngup nukinganik nukissiorfik maannakkut nukissiuummik tunniussinnaasaminninngaanniit annertunerusumik, erngup nukinga atorlugu, tunniussaqarsinnaanngitsoq.

Maannakkorpiarli innaallagissamik pisariaqartitsineq erngup nukinganik nukissiorfimmit isumagineqarsinnaavoq:

- Tasiilami erngup nukinganik nukissiorfik 1,3 MW-nik imaqqortussuseqarpoq. Tamannalu Tasiilap innaallagissamikpisariagartitaanut naammalluni, illogarfiullu ilaanut innaallagissiornikkut qaminnegarsinnaasumik kiassarnermi pisariagartinneqartog aamma ilanngullugu. Taamaasilluni Tasiilamit erngup nukinganik nukissiorneq innuttaasut innaallagissamik annertussutsikkut pisariagartitsinerinullu naammappog, taamaatorli kiassarnikkut pisagariaqartitsinerinut naammannani, Naalakkersuisoq ilisimatitsivoq.

Kalistat Lundip ilanngullugu ilisimatitsissutigaa, 2018-imi erngup nukinganik innaallagissiorfimmi teknikkikkut allannguutit atorlugit atorluaanerulerneq piviusunngortinnegarsimasoq. 2019-mi erngup nukinganik innaallagissiorfimmut atassuteqartup tatsip annertusarneqarnera piviusunngortinneqarsimavoq. Nukissiorfiimmillu paasissutissat maligllugit, taakkua tamarmik erngup nukinganik innaallagissiorfimmut pitsannguutaangaatsiarsimallutik.