Tasiilaq: Aallartitaq atugarliorneq pillugu oqalugiarsimasoq
Kikkut tamarmik atugarliulersinnaapput, ikiorserneqarnissarlu pingaaruteqarsinnaavoq. USA-p Kalaallit Nunaanni aallartitassaata, Tasiilami inuusuttut kulturikkut illorsuanni, Igdlomi, inuusuttunut oqalugiarami oqariartuutaa taamatut nipeqarpoq.
Amerikamut aallartitaat, Kalaallillu Nunaanni aallartitassaq Sung Choi sapaatip akunnerani kingullermi Tasiilamiissimavoq.
Illoqarfiup inuusuttortaasa amerikamiu inuusuttut kulturikkut illorsuanni, Igdlo, oqalugiartoq tassani naapisinnaasimavaat. Kommuneqarfik Sermersooq nittartakkamini allappoq.
Sung Choi nammineq inuttut atugarliorluni misigisimasani aallaavigalugit oqalugiarpoq.
World Trade Centerimi sulisimasoq
Taassuma ikinngunni imminu toqussimasoq annaasimavaa. Ikinngutai allat marluk innartorlutik ajunaarsimapput, aamma 2001-imi septemberip aqqarnanni Wold Trade Centerimi sulisimavoq.
- Allatut oqaatigalugu, nalunngilluinnarpaa inuuneq annernarsigaangat, kommuni allappoq.
- Inuusuttunut ersarissumik oqaatigaara, kisimiillutik atugarliornermik misigisaqarneq ajorputit, tamattali aqqusaartarparput. Piffissat oqimaassinnaasut qaangernissaannut ikinngutit, ilaquttat suleqatillu ikiuisinnaasut assut pingaaruteqartarput, Sung Choi oqarpoq.
Kommuneqarfik Sermersooq naapertorlugu inuusuttut 30-t missaanniittut aallartitap oqalugiarneranut tusarnaariarsimapput.
USA-p Danmarkimi aallartitaata Carla Sandsip apriilip qaammataata naanerani nalunaarutigaa, Sung Choi amerikamiut Nuummi aallartitaqarfianni pisortanngussasoq.