Tasiilaq uummammioraa
Eqqumiitsuliortoq Buuti Pedersen sumiiffippiamini iluarusuttarpoq ilisarisimasartaartortarluni, Danmarkimiuppat imaluunniit nunatsinni. Tasiilamullu – inunngorfimminullu Qaqortumut – uteqqiajuarpoq
- Tasiilamut asannilersoorluinnarsimavunga.
Tunumi illoqarfimmut asanninneq Skypekkut Nuup Faxe Ladepladsillu uinilu Ole G. Jensen ukiuni tallimani kingullerni najugarisaata akornanni attaveqarnermi Buutip eqqartugaasa siullersaraat.
Eqqumiitsuliortup tunuani iikkamiipput nannut marluk ikasartut qalipagannaavi, ilisarnaataanik taaneqarsinnaasut.
Tamanna kingusinnerusukkut uterfigissavarput.
Illoqarfik asannilersoorfigaa
Buuti Pedersen siullermeertumik Tasiilamut tikeraarpoq 23-nik ukioqarluni sunngiffimmi perorsaasutut ilinniarsimasutut, asannilersoorfigaalu. 1978-imi angalaneruvoq pisariusoq Island aqqusaarlugu inunngorfimminiit Qaqortumiit.
Qaqortumili sunngiffimmi perorsaasutut ukiuni marlunni sulereerluni aallarusutsappoq, immaqa angumminit qallunaamit kingornutaminik, saniatigullu angutaatini Tasiilami teleteknikeritut sulisoq aamma ornikkusuttarluni:
- Ilinniareerlunga pikkunaalliulaarpunga eqqarsarlunga: ”Arlaanik pisoqartariaqarpoq”, oqaluttuarpoq.