Tunu
Tasiilaq nutaarsiassanut aviisitaarpoq
Aviisi nutaaq Tasiilamit nutaarsiassanik taaguuteqarpoq, ukiumut sisamariarluni saqqummertassaaq
Kommuneqarfik Sermersooq aviisimik 'Tasiilami nutaarsiassat'-nik saqqummersitsisuuvoq, taanna ukiumut sisamariarluni saqqummertassaaq.
Aviisi nutaaq illoqarfimmut aamma nunaqarfinnut Tunumiittunut naqiterneqareerluni nassiunneqareerpoq. Aviisi Tasiilami inoqatigiinnut agguaanneqarpoq, nunaqarfinnilu Pilersuisumi tiguneqaannarsinnaalluni.
Illoqarfinni aamma allani
- Nutaarsiassat sermersuaq ikaarlugu sinerissamullu annguttarnerat kigaatsuararsuarmik pisarpoq. Soorunami tamanna akuersaaginnarneqarsinnaanngimmat aalajangerpunga, ukiumut sisamariarluni Nuup avataani innuttaasunut nutaarsiassanik, taakkununnga soqutiginaatilinnik nassiussisoqartalissasoq, borgmesteri, Asii Chemnitz Narup oqarpoq.
Tasiilarli taassumalu eqqaani nunaqarfiit kisimik aviisimik nutaarsiassanik imalimmik atuagassaqartassanngillat. Tassa Paamiut aamma Ittoqqortoormiit, taakkulu nunaqarfiisa innuttaannut naleqqussakkamik aamma aviiseqalissapput.
Aviisi Tasiilamit nutaarsiassat tulliani decembarimi saqqummissaaq.