Tasiilaq Avannaata Qimussersuini peqataaqquneqanngilaq

Nuna tamakkerlugu qimussimik Avannaata Qimussersuinik taallugu Ilulissani unammersuartoqalerpat, Tasiilaq eqqaamiuilu peqataaqquneqanngillat.

KNQK-mi siulittaasoq, Johan Olsen Sermitsiaq.AG-mut ilisimatitsivoq.

Nersutit nakorsaanerata aalajangerpaa Tasiilami eqqaanilu qimussertartut unammersuarnissamut peqataassanngitsut.

- Mattussaanermut peqqutaavoq sumiiffimmi qimmit akiuussutissamik kaporneqarsimanerat inatsit malillugu naammanginarsimanngimmat. Qimmit akiuussutissamik kapitittussat tamakkersinnaasimanngillat, Johan Olsen oqarpoq.

Tunillaassortoqarsinnaavoq

Nersutit nakorsaanerata aarleqqutigaa qimmit akornanni nappaalanersuaqalersinnaanera, qimmit tamakkerlutik kaporneqarsimanngippata, Johan Olsen ilisimatitsivoq.

- Qimmit Ilulissaniinnerminni tunillatsissimagunik, qimmillu nappaataat Tunumut eqqullugu, aqunneqarsinnaanngitsumik tunillaassortoqalernissaa aarleqqutigineqarpoq. Aamma taamatut illuanut, tunumiit qimmit nappaataat kitaanut eqqunneqartuussappat, Johan Olsen nassuiaavoq.

Qimmit akornanni nappaalanersuaqarnerit Kalaallit Nunaanni misigineqareersimapput. Saqqami aamma Qeqertani 2016-imi qimmit akornanni nappaalanersuaqarpoq, ikinnerpaamik qimmit 25-it toqqutigisaannik. Qimmit akornanni 2016-imi nappaalanersuaqareersorlu Naalakkersuisut aalajangerput qimmit akiuussutissamik kaporneqartarnerat inatsisitigut piumasaqaataalissasoq.

Sumiiffiit qulingiluat peqataatitaqassapput

KNQK ilisimatitsivoq Avannaata Qimussersuinut sumiiffiit qulingiluat, akiuussutissanik kaportissimasunik qimmillit, Ilulissani ukioq manna peqataasussanngortut. Meeqqat qimussersuaaraat 23. marts ingerlanneqassooq, inersimasullu 27. marts unammersuassallutik.

Uku peqataatitaqassapput:

• Qaanaaq eqqaalu
• Upernavik eqqaalu
• Uummannaq eqqaalu
• Saqqaq/Qeqertaq
• Ilulissat eqqaalu
• Qasigiannguit eqqaalu
• Aasiaat eqqaalu
• Kangaatsiaq eqqaalu
• Sisimiut eqqaalu