Skip to main content

Tasiilaq atoqatigiittarnermut tunngasutigut 16-inik ilinniartitsisoqalersoq

Ulluni 14-ini pinnguartarluni atoqatigiittarnerlu pillugu oqaloqatigiittarluni ingerlatsisoqareersoq, Tasiilaq inuusuttunik maligassiuisunik ilinniartitsisunillu 16-inik sulisoqalersimavoq, taakku meeqqat atuarfianni ajunngitsumik atoqatigiittarneq pillugu ilinniartitsisassapput.

Tasiilami qanittukkut timi atoqatigiittarnerlu pillugit oqallittoqarsimaqaaq. Pitsaasumik atoqatigiittarneq. Inuit marluk imminnut sammerusuttut ajunngitsumik atoqatigiittarnerat.

Inuusuttut kulturikkut illorsuanni Igdlo-mi inuusuttut 16-it assigiinngitsupilussuarnik tunuliaqutillit atoqatigiittarneq pillugu pikkorissartinneqarsimapput, pikkorissartinneqartut kulturikkut illorsuarmi namminneq piumassutsiminnik sulisuupput, diskotekimi matulerisuupput, kommunip allaffiani ilinniartuupput ataaserlu piniartutut inuussutissarsiuteqarusuttuulluni.  

Siunertarineqarsimavoq, inuusuttut timi atoqatigiittarnerlu pillugit meeqqat atuarfianni atuartunik angajullernik ilinniartitsissarnissaat, pikkorisaanermi aqutsisoq Sara Pais oqaluttuarpoq.

Pikkorissaanermi aqutsisut

Sara Pais Rigshospitalip inunnguutigalugu uummatimikkut nappaatillit immikkoortortaqarfiani peqqissaasuuvoq, inuusuttullu meeraanerminnit utoqqarmut ikaarsaarneranni sullittarlugit. Morten Ruge nakorsaavoq, ilaatigullu meeqqat inuusuttullu tarnikkut nappaatillit sullittarpai. Taakku marluullutik inuusuttut inersimasullu atoqatigiittarneq pillugu 2015-imili ilinniartittarsimavaat. Konception.dk atoqatigiittarnermut tunngatillugu ilinniartitsissutissanik nutaanik inerisaanermi immikkut ilinniarfiusoq  aamma inuusuttut akornanni atoqatigiittarnermut inuusuttunik ilinniartitsisussannik pikkorissaasarnermik ingerlataqartartoq marluullutik ingerlataraat.

- Meeqqat atuarfiini taamatut neqerooruteqarsinnaaneq amigaataarpasippoq. 16-iusunit ataaseq meeqqat atuarfianni taakkunannga ilinniartinneqaraarsimavoq, sinneruttulli pikkorissaaneq suli aallartinngittoq oqaatigaat ilinniartinneqarsimanatik.

Timikkut innarliisarneq pineqanngitsoq

Suliniut Igdlop innuttaasunik peqataatitsilluni inerisaasunik suleqateqarluni aallartissimavaa: 2019-imi politiit nalunaarusiaat, ilaatigut najukkami ineriartortitsinissamik atoqatigiittarnermullu tunngasutigut ilinniartitsisoqarnissaanik pisariaqartitsisoqarneranik oqariartuuteqartoq tunngavigalugu Tasiilami suleqatigiippugut. 

Tasiilami taassumalu eqqaani nunaqarfinni innarliisarneq, kinguaassiuutitigut nappaateqarpallaartarneq, imminut toquttartut amerlanerat naartuersittartorpassuillu nalunaarusiami allaaserineqarsimapput.

- Nalunaarusiami taaneqartorpassuit atoqatigiittarnermit aallaaveqartarput, pikkorissaanermi aqutsisoq Morten Ruge oqarpoq.

Pikkorissaanermili innarliisarnermik ajornartorsiuteqarneq qitiutinneqanngilaq. Aallaqqaammut timip ilikkarneqarnissaa, aaqarnermiit aaqaqqinnissap tungaanut timip susarnera timillu sananeqaataa paasitinniarlugit ingerlatsisoqarpoq.

- Pikkorissaqataasut pikkorissaanerup aallartinnerani aperaavut sunik tusagaqarusunnersut, pissutsillu tunngaviulluinnartartut qaqilerneqarluarlutik. Qaqilerneqartut oqaaseqartineqarnissaat pingaaruteqarpoq, kingusinnerusukkut ajunngitsumik atoqatigiittarneq il. il.  pillugit oqaluuserisaqassagaanni, taanna oqarpoq. 

Pikkorissaanermik aqutsisut taakku marluk Hans Poul Andersenimit Igdlomi atorfeqartumit oqaatsitigut ikorfartorneqarsimapput. Taanna politiitut ilinniagaqarpoq arlalitsigullu oqaluttaasarsimalluni.

Peqataasut tunniussimalluartut

Pikkorissaanermi aqutsisut pikkorissaanermi peqataasut tunniussimalluarsimanerat nuannaarutigeqaat.

- Inuusuttut tunniulluarsimallutik pikkorissarput, inuttut ataasiakkaatut pingaartumillu ataatsimoorlutik suliaqarnerminni ineriartorluarsimapput. Ilinniartitsinerup ingerlanerani immikkut ikioqatigiissinnaalluarlutillu imminnut tapersersorluarsinnaasimapput. Tamanna takullugu attortinnaqaaq, Sara Pais oqaluttuarpoq.

Inuuttut amerlanerit aallaqqaammut tunuarsimaalaarlutillu ittoorpasissimapput, tamannali qaangipallappaat, amerlanerusullu ilinniartitsisuunertik nuannarivittarlugu.

- Ilinniartitsisoqatigiit ataatsit meeqqat unikkallalaarniassammata ilinniartitsinerannik unitsitsisariaqarsimavugut, Sara Pais illarluni oqarpoq

Ilinniartitsisunngorlaat inuusuttunik allanit 100-t sinnerlugit amerlassusilinnik ilinniartitsereersimapput.

- Suut tamarmik aatsaat aallartilaaginnartut isumaqarpugut. Maannili suli ingerlariaqqinnissamut tunngavissaqarlualerpgut, Sara Pais oqarpoq.

Taanna Morten Rugelu inuusuttut pikkorissarsimanerminnut uppernarsaammik allagartanik agguaaffigineqareermata Tasiilamit aallarsimapput, siunissamili ilinniartitsinissamut napparsimmavimmi, politiini atuarfimmilu sulisut ikorfartuisartussatut pissarsiarineqarsimapput. 

Atoqatigiittarneq pillugu ilinniartitsisunngorlaat assingi ilanngutassiap aallartinnerani takukkit. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER