piujuaannartitsineq
Tasiilap eqqaani qilalukkat amerlassusaat misissuiffigineqartussanngorput
Pinngortitaleriffiup misissuinera piujuartitsinerup annertunerusulernissaanut iluaqutaassaaq
Ulloq 13. april 2016 Aningaasaqarnermut Akileraartarnermullu Ataatsimiititaliaq aalajangerpoq akueralugu Pinngortitaleriffik, 482.500 koruuninik ilassutitut aningaasaliiffigineqassasoq.
Aningaasat 2016-imi Tasiilap eqqaani qilalukkanik qernertanik nalunaaqutsersuinissaq pillugu misileraalluni suliniummut atorneqassapput, Namminersorlutik Oqartussat ilisimatitsipput.
Annikitsuaraannarmik ilisimaneqartut
- Tasiilap eqqaani qilalukkat qernertat sukkoorlutik ingerlaartarnersut, aammalu aasaanerata avataani sumi uninngaartarnersut annikitsuaraannarmik ilisimaneqarpoq. Taamaattumik ilisimasanik annertunerusunik katersinissaq pingaaruteqarpoq, taamaalilluta qilalukkat qernertat siunissami piujuartitsiviusussamik piniarneqartarnissaat siuarsaavigisinnaallutigu. Suliniut taanna tamatumunnga iluaqutaasinnaavoq, Pinngortitamut, Avatangiisinut Inatsisinillu Atuutsitsinermut naalakkersuisoq Mala Høy Kúko erseqqissaavoq.
Misissuinerit pitsaanerusut
Suliniut siunissami qilalukkat qernertat amerlassusaannik biologit pitsaanerusumik siunnerfeqarnerusumillu misissuisarnermik malitseqarsinnaavoq.
Maannakkut biologit siunnersuisarneranni 2008-imi kisitsinernit uumasut amerlassusaannik missiliuineq aallaavigineqartarpoq, taannalu ullumikkut annertuumik nalorninartortaqarpoq.
Atuaruk: Tunumi qilalukkanik kisitseqqinnissaq piareersarneqarpoq