Tasiilamit piviusulersaarut Bodilimut innersuunneqartoq
Inuusuttut Tasiilameersut pingasut pillugit piviusulersaarut sakkortooq nuannersorlu, Danmarkimi filmilianut nersornaasiuttakkamut Bodilprisimut piviusulersaarutini pitsaanerpaanut toqqagassat allat sisamat peqatigalugit innersuunneqarpoq.
Filmi 'TSUMU - Hvor går du hen med din drømme?' nuannarineqarlualereerpoq, ilaatigullu Nuuk Internationale Film Festival 2022-mi piviusulersaarutitsialattut nersornaaserneqareerpoq. Maanna danskit piviusulersaarusiaanni pitsaanerpaatut innersuunneqarpoq.
- Nuannerluinnarpoq, ilitsersuisoq Kasper Kiertzner, inuusuttunik pingasunik Tasiilameersunik filmimi malinnaasoq taama allappoq.
Filmimi Eino aamma Lars pingaartumik qanimut malinnaaffigineqarput. Tassani siunissamut neriuutaat takorluugaallu illuani takutinneqarput, illuanillu taakkulu ikinngutiminnut, ilaquttaminnut najukkamilu inuiaqatigiinnut pisussaaffii.
Inuuneq nuannersuuvoq
Inuusuttut pillugit oqaluttuaavoq tiguartisimanartoq, taakku inuunermut siunissamullu sapiissuseqarluarput, kisianni inuiaqatigiit nammatassarigunaraluagaannik akisussaafferujussuarmik tigumminnittuupput.
Filmimi inuusuttut pineqartut aamma filmimit oqariartuuteqarusupput, tassa kinguaariit tulliuttut nammineq misigisaminnik misigisaqannginnissaat kissaatigaat. Inuuneq nuannersuuvoq. Oqariartuut taanna filmimi pingaaruteqarpoq, taanna dr.dk-mi takuneqarsinnaavoq.
Filmimi pingaarnertut inuttaq ataaseq Eino Taunajik piffissami 24. januaarimit 8. februaarimut nunatsinni Qaqortumut, Sisimiunut, Aasianut aamma Ilulissanut angalassasoq, Kasper Kiertzner ilisimatitsivoq.