Tasiilami tunillatsissimasoqartoq: Mianersornissaq kaammattuutigineqarpoq
Tasiilami innuttaasut marluk coronavirusimik tunillatsissimapput. Taakku meeqqerivimmut attuumassuteqarmata meeqqerivik Mikisoq matugallarneqarpoq, pisussallu kommunip aaqqissugai taamaatinneqarlutik.
Tasiilami tunillatsissimasunik siullermeerluni paasisaqartoqarpoq.
Inuit marluk tunillatsissimasut, Kommuneqarfik Sermersuumi immikkoortortaqarfimmi pisortap Hjørdis Vibergip Sermitsiaq.AG-mut uppernarsarpaa.
- Meeqqerivik Mikisumut attuumassuteqartoqarmat meeqqerivik matugallarneqarpoq, inuillu qanillivallaarsimasut soorunami angerlarsimaannartussanngorlutik, Hjørdis Viberg oqaluttuarpoq.
Taanna nassuiaavoq kommunip sapaatip akunnerata naanerani ilaqutariinnut imigassartaqanngitsumik sammisaqartitsinissaagalua aamma taamaatiinnarneqartoq.
Eqqarsarluaritsi
Immikkoortortaqarfimmi pisortaq Hjørdis Viberg oqaluttuarpoq Tasiilami pissutsit maanna nalinginnaalluinnartut. Innuttaasulli ilaat qanermut assiaqutinik atuilereersimasut takusinnaallugit, oqaluttuarpoq.
Tasiilami innuttaasut 2.000-ngajaapput. Nunattalu sinneranit sanilliullugit illoqatigiiaariaasiat allaaneruvoq, tamannalu immikkoortortaqarfimmi pisortap ernumanartoqartissinnaavaa.
Illuni mikisuni kinguaariiaat arlallit illoqatigiissinnaasarmata tunillaassuunnerup ingalassimatinnissaa ajornaatsuinnaanavianngilaq.
Kinguaariiaat illoqatigiittut
- Ilaqutariippassuusarput, illoqatigiillu amerlasinnaallutik. Taamaattumik tunillatsissimasut imaaliallaannaq ingalassimaneqarsinnaanngillat. Mianersornissaq oqartussallu peqqussutaannik malinninnissaq soorunami innersuutigerusuppara, Hjørdis Viberg oqarpoq.
Taanna oqaluttuarpoq Tasiilami innuttaasut tunillaassuuttoqaleratarsinnaaneranik ernumassuteqarlutik siornatigut oqariartuuteqartarsimasut. Taamaattumillu sapaatip akunnerata naanerani mianersornissamik kaammattuuteqarpoq.
Tunillatsissimasunut qanillivallaarsimasut arlallit tallimanngornermi ataasinngornermilu misissortissapput.
Oqartussat majimi ilisimatitsipput Tasiilami innuttaasut tallimaagaangata sisamat akiuussutissamik kapitikkusuttut, taamaattumik akiuussusertissimasut amerlapput.