Tasiilami piterarnissaanik ilimasaarisoqaqqippoq
Tasiilami sisamanngorpat sekundimut 42 meterinik anorlertarsinnaanissaa DMI-mit aarlerisaarutigineqarpoq
Tasiilami ataasinngormat piterarpoq, sisamanngorpallu piterartoqaqqinnissaa aarlerisaarutaaqqippoq.
Sekundimut 42 meterinik anorlertarsinnaanissaa DMI-mit aarlerisaarutigineqarpoq.
Taamatut aarlerisaarisoqaraangat Tasiilami innuttaasut qanoq iliuuseqartarnersut Mala Høy Kukop Sermitsiaq.AG-mut ima oqaluttuaraa.
- 1970-ikkunni pisut eqqaallugit innuttaasut sillimasarput.
- Angerlarsimaffiit igalaavi matoorneqartarput aamma umiatsiat isumannaarneqartarput. Isumannaarinngikkaannimi imaaliallaannaq umiatsiaq annaaneqarsinnaavoq, Mala Høy Kuko oqarpoq.
Angajoqqaat meeqqerivinniittuutillit aamma atuartuutillit nalunaarfigiaarneqartartut ilisimatitsissutigaa.
Pingasunngormat anori sakkortutsikkiartulissaaq nalunaaqutaq 19.00-ip missaanit. Sisamanngorpat nalunaaquttap 15.00-ip missaani anori sakkortunerpaaffissaaniinnissaa aarlerisaarutaavoq.