Tasiilami piterarnissaa aarlerisaarutigineqartoq
Tasiilami innuttaasut politiinit upalungaarsimasunillu kaammattorneqarput, ilimagineqartutut arfininngornerup sapaatillu akornanni unnuakkut piteralernissaanut pigisaminnik isumannaarsueqqullugit angerlarsimaannaqqullugillu.
Tasiilami arfininngornerup sapaatillu akornanni unnuakkut piteralernissaa DMI-p ilimasaarutigaa, taamaattumik Kalaallit Nunaanni Politiit aamma Kommuneqarfik Sermersooq piterarnissaa pillugu innuttaasunut mianersoqqusipput.
Taamaattumik Kommuneqarfik Sermersuumi upalungaarsimasut innuttaasunut kaammattuipput pigisaminnik isumannaarsueqqullugit angerlarsimaannaqqullugillu. Tasiilami apeqqammerpoq taammaattumik persertarnissaa ilimanarpoq, kommuni nittartakkamini allappoq.
Tassani aamma ilisimatitsissutigineqarpoq, piterarnerani upalungaarsimasunit ikiornissamik pisariaqartitsigaanni qatserisartoqarfimmut sianersoqarsinnaasoq, oqarasuaammut 98 12 95-imut.
Anoraasuarsuartut sakkortutigisumik anoraasuartassasoq
DMI-p Tasiilamut silassamik ilimasaarutaani nutaanerpaami oqaatigineqarpoq, anori avannaq-kippasik unnuup ingerlanerani sakkortusiartussasoq unnuarulerneranilu natsimaasarnerup natsimanerallu akornanni sakkortussuseqalissasoq kiisalu anorersuartut sakkortutigisumik anoraasuartassasoq.
- Anori suli sakkortunerulissaaq ullaassanngoriartulerneranilu avannaq-kippasimmik anorersuannguuttartumik natsimaninnguutissasoq, anoraasuarsuartullu sakkortussusilimmik anoraasuartassasoq. Erseqqarissaaq -15 gradit missaanni ississalluni, DMI allappoq.
Piterarnerata nalaani silamiinnissaq politiinit aamma mianersoqqussutigineqarpoq. Tasiilami siorna septembarimi sakkortungaatsiartumik piterarpoq, tamatumanilu igalaarpassuit aseruatiterlutik, inuillu 47-t qimarngunneqarlutik.