Skip to main content

Tasiilami piniarnermut nakkutilliisoqartitsisoqalernissaa itigartitsissutigineqartoq

Arlaleriarluni inerteqqutaasumik piniartoqartarsimagaluartoq, Naalakkersuisut isumaqarput Tasiilaq piniarnermut nakkutilliisoqassanngitsoq.

Tasiilap eqqaani piniarnermut ukiorpassuarni nakkutilliisoqarsimanngilaq, tamannalu attanneqarsinnaanngitsoq, Inatsisartuni Siumut gruppianni ilaasortaq isumaqarpoq.

Taamaammat ukiakkut ataatsimiinnermi siunnersuutigineqarsimavoq, Tasiilami piniarnermut nakkutilliisoqalernissaa Naalakkersuisunit qulakkeerneqassasoq.

Kisiannu Aalisarnermut, Piniarnermut Nunalerinermullu Naalakkersuisup Jens Immanuelsernip akissutaani tamanut saqqummiunneqaqqammersumi, Naalakkersuisut innersuussutigaat siunnersuut itigartinneqassasoq.

Immanuelsenip oqaatigaa, Tasiilap eqqaani nakkutilliisoqarneq Nuummi piniarnermut nakkutilliisumit isumagineqartartoq, unioqqutitsisoqarsinnaanera aallaavigalugu naliliisoqaraangat Tasiilamut nakkutilliiartornissaanik aalajangiisoqartarluni.

Ukiunili pingasuni kingullerni nakkutilliisoqarsimanngitsoq, naalakkersuisup ilisimatitsissutigaa.

Malittarisassanik arlaleriarluni unioqqutitsisoqartarsimasoq

Siunnersuutip itigartinneqarnissaanik innersuussisoqaraluartoq, Jens Immanuelsen naapertorlugu Tasiilami malittarisassat unioqqutinneqartarsimapput, tassa piniakkat eqqissisimatitat piniarneqartarsimapput aamma akuersissuteqarani piniartoqartarsimavoq, pisanik nalunaarutiginnittoqartarsimanngilaq kiisalu piniakkat pisassiissutigineqartut piniarneqarnissaasa avataatigut piniartoqartarsimalluni:

- Naalakkersuisut ilisimavaat, tamaani qilalukkat qernertat nannullu ukkatarineqangaatsiartut taakkununngalu pisassiissutit ukiuni kingullerni tallimani sipporneqartartut. Arferit anginerit arlallit tamaaniittarput, aamma arferit anginerit eqqissisimatitat amerlasuut pissatarineqartartut nalunaarutigineqartarpoq, Jens Immanuelsen allappoq.

Naalakkersuisulli nalilersimavaat, Tasiilap eqqaani piniagassat killeqarnerat pissutigalugu, tuttunik, umimmannik qilalukkanillu qaqortanik takussaasoqarneq ajormat Tasiilap eqqaani piniarnermik nakkutilliisumik ataavartumik inissiinissaq naleqqutinngitsoq.

Aalisarsinnaanermut nakkutilliisoqarfik sipaarniuteqassasoq

Aningaasaqarnermulli aamma tunngassuteqartoqarpoq. Aallartisarnermi aningaasartuutaasussat to millioner koruuniussasut, tamatumalu kingorna piniarnermik nakkutilliisumik ataavartumik inissiisoqassappat ukiumut ingerlatsinermi aningaassartuutit 1 million koruunit missaanniittassasut nalilerneqarsimavoq.

- Kalaallit Nunaanni aningaasaqarnikkut inissisimaneq pissutigalugu Kalaallit Nunaanni Aalisarsinnaanermut Akuersissutinik Nakkutilliisoqarfik peqquneqareerpoq sipaarniuteqassasoq, taamaattumillu Tasiilami piniarnermik nakkutilliisumik pilersitsisoqarnissaanut aningaasanik immikkoortitsinissaq periarfissaqanngitsoq, Kalaallit Nunaanni Aalisarsinnaanermut Akuersissutinik Nakkutilliisoqarfimmi suliassanut pioreersunut annertuumik kingunerlussinnaammat, Jens Immanuelsen allappoq.

Immanuelsenip naggataatigut innersuussutigaa, aalisarnermut nakkutilliisoqarfik politiinik Issittumilu Sakkutooqarfimmik piniarnermik angallatinillu nakkutilliinissamut pisinnaatinneqartunik suleqateqartoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER