Tasiilami meeqqat inuusuttullu nipilersornermik workshoppertinneqartut

Nipilersornermik Ilinniarfik, NIPITU, ukiakkut atuanngiffeqarnermi tunup illoqarfiani, ulluni qulini nipilersornermik ilinniartitsissaaq

Meeqqat inuusuttullu Tasiilami oktobarip sisamaanit aallartittumik nipilersornermik ilinniartinneqassapput.

Nipitu Tasiilamukartussanngorpoq, tassani kalaallit danskillu nipilersortartut nipilersornermik ilinniartitsiniarlutik qaaqqusipput, Nipitu tusagassiorfinnut nalunaaruteqarnermini allappoq.

Innuttaasunut tusarnaartitsineq

- Ukiut tamaasa inunnik nutaanik takusaqartarpugut, taakkuli ilarpassui aamma ukiut tamaasa takkuteqqittarput, oqaluttuarisarpaallu peqataasarnertik iluaqutigilluartarlugu, suliniummi aqutsisoq Jakoba Søvndahl Skovaa oqaluttuarpoq.

Nipilersornermik ilinniartitsineq oktobarip 15-iani naggaserlugu, illoqarfimmi innuuttaasunut tusarnaartitsisoqassaaq, tassani peqataasut ulluni qulini ilinniarnerminni ilikkarsimasaminnik takutitsissapput.

Sakkussat amerlanerit

- Tasiilami meeqqat inuusuttullu nipilersornermik piginnaasaqarluartuupput, nuannarisarpaallu qitinniarluik nipilersorniarlutillu naapeqatigiittarnertik. Piginnaasaat ineriartorteqqikkusuppavut aamma nipilersornerminni inooqataanerminnilu sakkussaannik amerlanerusunik, angerlarunik atorsinnaasaaannik tunerusuppavut, Jakob Søvndahl Skovaa oqarpoq.

Ilinniartitsisuussapput Pernille Kreutzmann (Tiu-mi erinarsortartoq), Ove Mørch (Da Bartali Crew-imi tumerparpaartartoq), Josef Joelsen (tivasartoq/erinarsortartoq), Freddy Christensen

(guitar/bas), Miccel Mohr (immiussisoq), Troels Mørkenborg (pattagiarsortartoq, erinarsortaroq, SSB) aamma Niina Petersen (Misigissutsit imminullu tatigineq).

Powered by Labrador CMS