Tasiilami meeqqat inuusuttuaqqallu pisimasoqarluartumik sammisassaqartinneqassapput

Uani sapaatip-akunnerani Tasiilami meeqqanut inuusuttuaqqanullu sammisassarpassuaqarpoq.

Ulluni pingasuni sammisaqartitsiffiusuni peqataasut unnukkut arfinermut nereqatigiisinneqartassapput, sammisaqartitsinerit illoqarfiup timersortarfiani pissapput, sisamanngornermilu meeqqat inuusuttullu katersortarfimmiissapput.

Kissaatigineqarluartoq
Ullut pingasut ingerlanerini meeqqat inuusuttullu pissitassaqarluni qulaasseriarnerit, illorsualiaq pullattakkami pississaarnerit, kiinnat qalipanneri, orienteringsløbi, assigiinngitsunik assassaornerit, natermi assigiinngitsunik timersornerit amma arsaannerit assigiinngitsut.

Sisamanngornermi tallimanngornermilu unnukkut filmimik isiginnaarsinnaapput.

Kommuneqarfik Sermersuumi borgmesterip Asii Chemnitz Narupip (IA), ulluni makkunani Tasiilami meeqqanut sammisassarpassuaqarnera qiimmatsaatigaa.

- Tasiilamut sapaatip-akunnerani kingullermi tikeraarninni illoqarfimmi innuttaasut kissaataasa annersaraat meeqqat inuusuttuaqqallu sammisassaqartilluarneqartarnissaat. Tamannalu erngerluta qanoq iliuuseqarfigaarput aamma Timersortarfiup ammasarfiisa sivitsorneqarnissaat aalajangullutigu.

- Tassalu tamakku tamarmik iluatseriarmata meeqqat inuusuttuaqqallu ulluni pingasuni sorpassuarnik sammisassaqartinneqarnissaat piviusunngortillutigu. Taamaaliornitta siunertaraa meeqqat inuusuttuaqqallu nuannersumik toqqissisimanartumillu misigisaqartinneqarnissaat, taanna tusagassiuutinut nalunaarutimini oqarpoq.