Tasiilami meeqqanik kingunerlutsitsisunik katsorsaajartorlutik angalasartut COVID pillugu killilersuutinut eqqorneqartut

Nunatsinni corona pillugu sillimaniarnermut iliuuserineqartut pissutigalugit meeqqat kinguaassiuutitimikkut atornerlunneqarsimasut katsorsarniarlugit angalasartut Tasiilamukarnissaminnut ajornartorsiuteqarujussuarput.

Obs: Nunatta avataaneersut katsorsaasartut aamma nunatsinneersut katsorsaasartut pillugit isumaginninnermut aqutsisoqarfimmit oqaaseqaat nal. 9.10 ikkunneqarpoq.

Psykologit psykoterapeutillu Tasiilami meeqqat inuusuttullu kinguaassiuutitimikkut atornerlunneqarsimasunik katsorsaajartorlutik angalasartut, ukiup affaani kingullermi Tasiilamukarsinnaasimanngillat.

Isumaqatigiissutaasimagaluarpoq meeqqanik kingunerlutsitsisunik katsorsaajartorlutik angalasartut qaammatit tamaasa Tasiilamut tikittassasut.

Meeqqat kinguaassiuutitigut atornerlunneqarsimasut kingunerluutiminnit katsorsarneqartussaagaluartut, corona pissutigalugu utaqqitinneqarallarput.

- Corona pissutigalugu aammalu malitsigisaanik killilersuutigineqartut pissutigalugit psykologit aamma psykoterapeutit Tasiilamut angalasinnaasimanngillat. Nunanit allanit tikinneq ajornarnerulersimavoq, tamannalu isumaqarpoq Tasiilamut meeqqanik katsorsaajartorlutik tikittartut ukiumi affarmi kingullermi tikinngitsuuissimasut, Tasiilami kommunip allaffiani meeqqat ilaqutariillu pillugit suliani pisortaq, Lene Warwick oqaluttuarpoq.

- Meeqqat katsorsartinnissaannik neriorsorsimasaraluagut katsorsartinngitsoormata, taamaasilluta aamma tatigiuminaassinnaanerput paasisinnaavarput, suliani pisortaq oqarpoq.

Pissutsit erloqinartut

Lene Warwick oqaluttuarpoq meeqqat kinguaassiuutitigut atornerlunneqarsimasut kannguttaatsuliorfigineqarsimasullu katsorsartissinnaannginnertik pillugu erloqissuteqartut.

- Katsorsarneqarsinnaannginnerminni ilungersorput, Lene Warwick oqarpoq.

- Ajornartorsiutigaarput meeqqat inuusuttullu kinguaassiuutitigut atornerlunenqarsimasut kannguttaatsuliorfigineqarsimasullu katsorsarneqarnissaannut illoqarfitsinni namminneerluta ilinniarsimasunik sulisussaqannginnatta. Ilinniarsimasut sulisinnaasut nunanit allaneertut pinngitsoorsinnaanngilagut, oqarpoq.

Isumaginninnermut aqutsisoqarfiup uppernarsarpaa katsorsaasinnaasut nunanit allaneersut COVID-19 pillugu killilersuutinit eqqorneqartarmata. Taamaattoq katsorsaasinnaasut nunatsinni najugaqartut nunanullu allanut ulluni 14-ini kingullerni angalasimanngitsut, Tasiilamut illoqarfinnullu allanut tikeriaannaapput.

Ataavartumik suliniuteqarnissaq ujartorpaa

Nunanit allanit angalasut Tasiilamut tikinnginnerminnit Nuummi ullut tallimat inuiaqatigiinnut akuliunnaveersaaqqaartussaapput, taamatullu Tasiilamukannginnerminni coronavirusimut misissorteqqaartassallutik.

Tamaanna isumaqarpoq katsorsaasut Danmarkimeersut Tasiilamut angalassagunik angalanissartik ullunik tallimanik sivitsorsinnaagaat.

Meeqqat kinguaassiuutitigut atornerlunneqarsimasut kingunerluuteqartut katsorsariartorlugit angalasartut maanna Tasiilamiipput. Ukioq manna aappassaat tikittut, kommunimi meeqqanut ilaqutariinnullu ingerlatsivimmi pisortaq, Martha Lund Olsen ilisimatitsivoq.

Ersarissumilli nalunaarutigineqarsimanngilaq meeqqat kinguaassiuutitigut atornerlunneqarsimasut kingunerluuteqartut katsorsarniarlugit angalasartut tulliani qaqugu tikeqqissanersut, kommuni ilisimatitsivoq.

- Naluarput qaqugu ikiuinissamik neqerooruteqaqqissinnaanerluta. Tamanna ajornartorsiuterujussuuvoq meeqqanut maanna katsorsarneqartunut, aammalu meeqqanut katsorsarneqarnissamik pisariaqartitsisunut. Meeqqat katsorsarneqarnissaat qaqugu pissanersoq ilisimatitsissutiginagu meeqqat qimaannarsinnaanngilagut. Kinguaassiuutitigut atornerlunneqareernerup kingorna katsorsarneqarnissamik pisariaqartitsipput, Lene Warwick oqarpoq.

Meeqqat kinguaassiuutitigut atornerlunneqarsimallutik kingunerluuteqartunik katsorsaajartorlutik angalasartut kommunit Namminersorlutik Oqartussallu suleqatigiissutigivaat. Isumaginninnermut aqutsisoqarfik ilisimatitsivoq ukiup naanissaata tungaanut katsorsaajartornissat pilersaarusiorneqarsimasut.

Powered by Labrador CMS