Tasiilami piterartoqarnissaa DMI-p ilimasaarutigaa, tamannalu marlunngornermi maajip 23-ni ualiartornerani aallartinnissaa ilimasaarutigineqarpoq, pingasunngornikkullu ullaap tungaani sakkukilliartulernissaa naatsorsuutigineqarluni. Kommuneqarfik Sermersooq nittartakkamini taama allaaserisaqarpoq.

DMI naapertorlugu marlunngornermi unnukkut nalunaaqutaq 21 missaani sakkortunerpaassasoq ilimasaarutigineqarpoq.

Anorlilinnginnerani pigisat aalajangersorsimanissaannut, upalungaarsimasut taamaattumik innuttaasunut kaammattuutigaat.

- Innuttaasut anorlerneranut atatillugu toqqissisimanngikkunik imaluunniit ernumagunik, anorlilinnginnerani allanik ilassarsiornissaannik qinnuigineqarput, kommuni nalunaaruteqarpoq.

Illup iluaniiginnaritsi

Kalaallit Nunaanni Politiit innuttaasunut Facebookikkut aamma aarlerisaaruteqarput, tassani piterarnerani Tasiilami innuttaasut illup iluaniiginnaqquneqarput, taamaalilluni sakkortunerpaaffiani pisariaqanngitsumik angallattoqarnissaa pinngitsoorneqassammat.

Atortut pigisat tinginneqarsinnaasut isumannaarneqarnissaannut politiit Tasiilami innuttaasunut aamma kaammattuutigaat.

Siorna septembarip naanerani illoqarfik piteqqamit sakkortuumit eqqorneqarpoq, tassani illoqarfimmi sumiiffinni amerlasuuni aseruatitsivoq, tassanilu innuttaasut 50-t missaanniittut anorlernerani qimagussortinneqarput.

Piterarnerata nalaani kommunimit imaluunniit upalungaarsimasunit ikiorneqarnissamik pisariaqartitsigaanni upalungaarsimasunut sianertoqarsinnaavoq, oqarasuaat +299 367789-imut.