Tasiilami kulturikkut sammisassaqartitsisoqalersoq

NunaFonden aamma Sermeq pulje aningaasaliisoralugit Tasiilami sapaatip-akunnerini 46-mi 47-milu inuusuttut kulturikkut illuanni eqqumiitsuliornikkut sammisassaqartitsisoqassaaq.

Den Rejsende Forfatterskole (atuakkiortunngorniarfimmit angalasartut) sammisassaqartitsinermik aaqqissuussisimapput, Rockerlutik nipilersortartut Nanook Frederik aamma Christian Elsnerikkunnik siuttullit atuakkiortorlu Niviaq Korneliussen sapaatip-akunneri pineqartuni Tasiilamut tikeraarpata naapinneqarsinnaasut ilagaat.

Kommuneqarfik Sermersuumi Sunngiffeqarnermut Kultureqarnermullu Ingerlatsivimmi pisortap Hjørdis Vibergip Sermitsiaq.AG-mut oqaluttuaraa, kommunip assigiinngitsutigut neqerooruteqartarneranut nammineq piumassutsiminnik suliaqartartut neqerooruteqartarnerat tapertaalluartartoq.

- Kulturi ikiorsiullugu inuusuttut ineriartornissaannut, kinaassutsiminnik imminnullu naleqartinnerminnik suliaqarnissaannut kulturi tunngaviusinnaavoq, taannami aqqutigalugu imminnut takusinnaalerlutillu imminnut nukittorsarsinnaammata, pisortaq oqarpoq.

Innuttaasut isumaat malinneqartoq

Inuusuttut kulturikkut illuat Igdlo sammisassaqartitsisuuvoq, ilaatigullu illoqarfimmi inuuniarnikkut ajornartorsiutaasartut qanoq qaangerniarneqarsinnaanersut illoqarfimmilu innuttaasut pitsaasunik sammisassaqartinneqarnissaat qanoq pilersinneqarsinnaanersut pillugit oqaloqatigiittarnerit tassani tunngavigineqarlutik.

- Sinaakkutissanik pilersitsisimavugut, inuusuttullu aperisimavagut suut sinaakkusiunneqassanersut.

Sapaatip-akunnerini aggersuni aaqqissuussat ilagaat, atuakkiortutut nersornaaserneqarsimasup Niviaq Korneliussenip atuakkiaminik ’Naasuliardarpi’-mmik ilaatigut Tasiilami pisimasuutitamanik atuffassinissaa.

Inuusuttut inersimasullu Igdlomi Katersortarfimmilu aaqqissuussisoqarnerani atuakkiortup naapinnissaanut periarfissaqarput.

Niviaq Kalaallit Nunaanni inuusuttut sinnerlugit oqaaseqartartutut akuerisaasoq inuusuttorpassuarnit malinnaaffigineqartarpoq, minnerunngitsumillu inuusuttunit Den Rejende Forfatterskolep worksoppertitsineranut peqataasimasunit .

Nipilersortartut Nanook nipilersornermik ilinniarfik peqatigalugu workshoppertitsissapput illoqarfimmilu najugalinnut tusarnaartitsissallutik. Aamma nipilersortartutut tusaamasaalluartoq Karl Siverrtsen pillugu filmiliamik takutitsissapput, inuusuttullu aningaasartuuteqarpallaarani atortorissaaruteqarpallaaranilu mobiltelefoni atorlugu qanoq filmeeraliorsinnaanermut isumassarsiortinniarlugit filmiliortarneq pillugu oqaluttuassallutik.

Illoqarfimmi toqqissisimasoqarlunilu eqqissisimasoqartoq

Susassaqarfimmi pisortaq naapertorlugu, sammisassarpassuit illoqarfimmi suliniutit arlallit ilagingaat, kommuni inuiaqatigiillu suleqatigiillutik illoqarfimmut tamarmut iluaqutaasussanik suliniuteqartarlutik.

-Piffissat aningaasaateqarnerulerfiusartut immikkut eqqumaffigisarpavut. Taamaalilluta meeqqat inuusuttullu aqqusinermi susassaqaratik angalaarnissaannut sanilliullugu arlalinnik sammisassaqartitsisarpugut, Hjørdis Viberg oqaluttuarpoq.

Taassuma erseqqissaassutigaa, illoqarfimmi imigassartaqanngitsumik aaqqissuussisoqaraangat tamanna sunniuteqarluartartoq.

- Aningaasarsisoqaraangat isumaginnittoqarfiit politiillu qanoq ulapitsigisartut takusarparput. Sammisassaqartitsisarnerit illoqarfimmi eqqissisimatitsillutillu toqqissisimalersitsisarput. Kingullermik aningaasarsisoqarmat tamanna malunnaqaaq, tassa inuusuttunut sammisassaqartitsilluarlutalu neqerooruteqarluaratta. Sammisassaqartitsisarneq sunniuteqarluartarpoq, tamannalu ingerlattuassavarput, taanna oqarpoq.